Otvorený list

Дорогый наш юбіланте!

З нагоды Твоёго вызнамного жывотного юбілея хочу Ті заблагожелати і высловити пару щірых слов, в котрых Ті хочу подякоавти в мені моёй родины і в мені многых далшых членів Здружіня інтеліґенції Русинів Словеньска за Твою цінну роботу на полі русиньского оброджіня.

Шырокы кругы русиньской комуніты познають Твою роботу як доктора, вызнамного одборника і професіонала, але тыж як чоловіка, котрый в преломовых роках по Ніжній револуції ся сміло поставив до чела Здружіня інтеліґенції Русинів Словеньска. Той орґанізації, котра за остатніх 10 років і Твоёв заслугов звидітелнила русиньску народностну меншыну на цілім Словеньску як етнікум інтеліґентных і освідченых людей, схопных презентовати свій народ в позітівнім світлі.

Милый наш юбіланте! Кедь єсь в минувшых днёх зажыв, так повісти, „deja vu” споєне з Народныма новинками, котры недавно опубліковали цалком іншу благожелателну статю о Тобі, але тыж єй підписали моїм меном, то знай, же доправды іде о „deja vu”. Зато поважую за свою повинность увести тоту „кавзу“ на справну міру. Проблем є в тім, же тота „інша” статя была наперед написана і опублікована в Русиньскім календарі на рік 2001. Теперь по пятёх роках шефредактор Народных новинок Александер Зозуляк без мого відома статю перебрав і в минулых днёх єй самовольно опубліковав. Зробив то без огляду на факт, же текст быв написаный і опублікованый перед пятёма роками(!).

Тото вшытко ся стало без того, жебы пан шефредактор НН ословив мене як авторку статі і пожадав доволіня маніпуловати з моїм текстом. Притім ёго не заставило ани то, же своїм поступом він явно порушыв авторьскый закон.

Дорогый юбіланте, зо желанём довголітя, здравя і погоды в кругу Твоїх найближшых желам Ті далшых творчіх успіхів в роботі а іщі раз Тя поздравую і высловую пожеланя, жебы шырока русиньска верейность ся з Тобов все і надале охотно стрічала на інтересных і приємных русиньскых акціях.

Марія Хомова