Označena 90-ročňica drukovaňa "Gramatiki bačvansko-ruskej bešedi" dr Havryjila Kosteľnika

Означена 90-рочнїца друкованя „Граматики бачваньско-рускей бешеди” др Гавриїла Костельника
У Шветочней сали Маґистрату у Сримских Карловцох, всоботу отримана шветочносц з нагоди 90-рочнїци друкованя „Граматики бачваньско-рускей бешеди" др Гавриїла Костельника, з чим урядово кодификовани язик Руснацох на тих просторох. У програми участвовали проф. Микола М. Цап, мр Анамария Рамач Фурман, др Дюра Гарди и Александер Мудри, а у музичней часци Йовґен Надь.
 
Модератор трибини бул Велимир Паплацко, а присутних привитал предсидатель Општини Сримски Карловци Миленко Филипович, котри бешедовал и о традициї сербско-руско-українских вязох у тей Општини. Сход, а окреме на нїм присутних госцох зоз Словацкей, з Бардейова, котри пребували у Войводини, привитал и предсидатель Одбору за службене хаснованє язика и писма Националного совиту Руснацох и Союзу Руснацох Українцох Сербиї Боґдан Виславски, котри бешедовал и о хаснованю нашого язика у школох и дружтвеним живоце у прешлосци и тераз.
 
Проф. Микола М. Цап, одвичательни редактор нашого часопису „Шветлосц", пречитал роботу „Гавриїл Костельник - основоположнїк култури и националного идентитету Руснацох у Войводини", Мр Анамария Рамач Фурман презентовала реферат з тему „Ґраматика бачваньско-рускей бешеди" др Гавриїла Костельника як фундамент руского литературного язика", а др Дюра Гарди инспиративно бешедовал о Гавриїлови Костельникови з историйного аспекту.
 
Стихи др Гавриїла Костелника по руски и по сербски интерпретовал Александер Мудри, а у музичней часци участвовал Йовґен Надь.
 
У сали дзе отримана трибина були виложени и шицки виданя хтори у друкарнї у Сримских Карловцох до тераз видруковани на руским язику.
 
Орґанизаторе означованя програми з нагоди рочнїци „Ґраматики" Гавриїла Костельника були Союз Руснацох Українцох Сербиї, Одбор за службене хаснованє язика и писма Националного совиту Руснацох, Општина Сримски Карловци, Оддзелєнє за русинистику Филозофского факултету Нови Сад и НВУ „Руске слово" - Редакция часопису „Шветлосц".

автор:  вев