Peremožc’om literaturnoho konkurzu Charytun  

V pjatnic’u 14-ho decembra 2018-ho roku v Pr’ašovi obŷlo s’a vŷhološiňa peremožciv Literaturnoho konkurzu Mariji Maľcovskoj i prezentacija ocinenŷch tvoriv.

Konkurz vže 5-ŷj raz vŷholosyv Spolok rusyňskŷch pysateliv Sloveňska v spivpraci iz Akademijov rusyňskoj kulturŷ v Slovac’kij republici i Іntitutom rusyňskoho jazŷka i kulturŷ Pr’ašivskoj univerzitŷ v Pr’ašovi, v kotroho prostorach svjatočna podija prochodyla.

Pryhološenŷch visem pysateliv
Do literaturnoho konkurzu štorik možuť pryholosyty s’a avtorŷ, kotrŷ pyšuť po rusyňskŷ i kotrŷ suť hraždanamy Slovac’koj republikŷ. Zahnaty mož lem tvorŷ, kotrŷ doteper’ ne bŷly išči publikovanŷ.

Tot rik do konkurzu pryholosylo s’a visem avtoriv. Fachova žuri, kotra bŷla v skladi Mychal Pavlič – predseda žuri, Kvetoslava Koporova i Mychala Holubkova, ociňovala jak poetičnŷ, tak i prozovŷ tvorŷ. Nakonec’ žuri vŷholosyla peršŷ try misc’a.

Peremožc’om je Charytun
„Treťe misce zdobŷv Josyf Kudzej za svoji bajkŷ z kapkov spoločeňskoj kritikŷ. Porota ocinyla jich humor i ritmične obrobliňa,“ poviv pro radio rusyn FM predseda žuri Mychal Pavlič.

Na druhim misci v 5-im ričnyku Literaturnoho konkurzu Mariji Maľcovskoj skinčila Ľudmyla Šandalova, avtorka poeziji, prozŷ i teatralnŷch scenariv pro ditej. Tot rik zalučila s’a do konkurzu liričnŷma tvoramy.

Na peršim misci skinčiv i cilkovŷm peremožc’om konkurzu stav Jurko Charytun, rusyňskŷj poet, kotrŷj je majstrom svoho remesla na profesionalnij urovny. „Porota ocinyla mnohoznačnosť i obrobliňa stychiv, kotrŷ mož zadilyty do refleksivnoj i duchovnoj lirikŷ,“ informovav Pavlič.

Najlipšŷ tvorŷ buduť publikovanŷ v časopysi Rusyn, kotrŷj maje u každim vŷdaňu svij literaturnŷj dodatok pid Pozdravliňa Rusyniv.

PETRO MEDVІĎ 

Žridlo:
http://www.lem.fm/peremozhtsom-literaturnogo-konkurzu-haritun/