Perša prehlašena ľistina "Ruskej ligi"

Перша преглашена лїстина ”Рускей лиґи”

 

БЕОҐРАД - Лїстина "Руска лиґа", чия ношителька Олена Папуґа, перша хтору Републична виберанкова комисия преглашела за виберанки за Национални совит рускей националней меншини, хтори буду 26. октобра, так же по виберанкових предписаньох, тота лїстина будзе под шорним числом єден на збирней лїстини, односно на гласацким лїстку. "Руска лиґа" свою лїстину придала штварток, а преглашена є вчера.

 

На лїстини 16 кандидати за членство у новим зволаню Националного совиту Руснацох, хтори ма 19 членох, а кандидатуру лїстини "Руска лиґа" з оверенима подписами потримал 141 гласач уписани до окремного виберацкого списку.

 

Лїстину кандидатох "Рускей лиґи" у цалосци мож опатриц на веб-сайту Републичней виберанковей комисиї - www.rik.parlament.gov.rs у обласци "документи", подобласц "виберанково лїстини".

 

После 10. октобра, односно придаваня шицких виберанкових лїстинох за Национални совит Руснацох, Рутенпрес окреме обяви мена кандидатох на шицких лїстинох.

 

--------

 

Виберанково лїстини за участвованє на виберанкох за национални совити, хтори буду 26. октобра, найпознєйше мож придац по 10. октобер, сообщела Републична виберанкова комисия (РИК). Шицки значни информациї и календар предвиберанкових активносцох обявени у Роковнїку и Упутстве за окончованє виберанкового процесу, хтори мож превжац зоз сайту РИК на адреси www.rik.parlament.gov.rs у обласци "виберанково документи", дзе мож превжац и потребни виберанково формулари.

 

Виберанкову лїстину може придац ґрупа гражданох чийо члени уписани до окремного виберацкого списку, здруженє хторе свойо цилї витворює у обласци защити меншинских правох, лєбо реґистрована политична партия националней меншини.

 

Виберанково лїстини ше придава у шедзиску РИК у Беоґрадзе, у будинку Народней скупштини Републики Сербиї.

 

автор:  саб