Perše čislo "Hlasu Rusyna"

Перше число “Гласу Русина”  
Тих дньох вишло перше число медзинародного часопису “Глас Русина” (“Голос Русина”), котри видава Шветови конґрес Руснацох/Русинох/Лемкох (РРЛ), як проєкт потримани од Влади Републики Словацкей, а у його реализациї участвую орґанизациї, членїци Конґресу.

Проєкт предвидзує друкованє спомнутого глашнїка штирираз до рока, на 22 бокох, часточно у колору, а на русинских диялектох зоз жемох дзе Руснаци жию.

Видаванє “Гласу  Русина”, як заєднїцкого глашнїка РРЛ привитал и предсидатель Шветовей ради РРЛ Дюра Папуґа, наглашуюци потребу за медзисобне информованє о поєдинєчних и заєднїцких активносцох, цо драга и ґу глїбшому  похопйованю и векшей медзисобней блїзкосци.

- Гоч у векшини жемох у хторих жию Руснаци постоя окремни глашнїки, нєдостава єден заєднїцки, так же “Глас Русина” будзе часопис котри  будує  фундамент за  глїбоки и тирваци змисел руского заєднїцтва - гварел Папуґа. 

Часопис креирую авторе и редакторе з дзешец жемох швета, одкаль и русински организациї, членїци Шветового конґресу.

- “Голос Русина” будзе пошвецени роботи, активносцом и документом Шветового конґресу Русинох, а будзе зазначовац и роботу його членїцох. Источашнє, будзе место за информациї о рускей заєднїци з цалого швета - гварела за Рутенпрес координаторка проєкту и заменїца главней редакторки Силвия Лисинова з Прешова, наглашуюци же чаоспис значни и за очуванє русинскей националней свидомосци и етнїчного идентитету у окруженьох дзе жиєме.

- Кажде число часопису будзе  резултат роботи заєднїцкей редакциї, чийо члени медзисобно комуникую прейґ интернету цо, свойофайтова спокуса - гвари главна редакторка “Гласу Русина” Єлена Перкович, наглашуюци же то вимага окремну професийну схопносц и медзисобне професийне довириє.

- Бешеда на котрей ше часопис друкує руска, односно вариянти диялектох РРЛ у жемох дзе жию. Очекуєме же так конциповани  часопис будзе єден з важних мостох котри ше у остатнїх двох деценийох будую медзи припаднїками рускей заєднїци розошатей по цалим швеце - гварела Перковичова.

Спрам проєктних задаткох, по штредок януара 2012. року виду ище три числа часопису, а окрем класичного новинского виданя, “Глас Русина” мож почитац  и на  веб-порталу:
www.rusynworldcongress.org  

конєц (єп)