Perši "Rusyn film fest" počatkom oktobra u Šidze

Перши „Русин филм фест” початком октобра у Шидзе

 

НОВИ САД – У орґанизациї Реґионалного одбору Рускей матки за Срим у Шиду, а у рамикох активносцох Шветового конґреса Русинох/Руснацох/Лемкох (РРЛ) и Рускей матки, 1. и 2. октобра будзе отримани Перши медзинародни мултижанрови русински филмски фестивал „Русин филм фест”.

 

Перши „Русин филм фест” будзе пошвецени страданю Русинох/Руснацох/Лемкох у Першей шветовей войни, окреме у Лаґру „Талергоф” при Ґрацу у Австриї, о чим длугометражни документарни филм знял Алексей Денисов, режисер зоз Москви у Русийскей Федерациї. Вєдно з нїм, на Перши „Русин филм фест” до Шиду наявени приход и представнїкох Русийскей амбасади у Беоґраду, членох Шветовей ради РРЛ, представнїкох Комисиї за културу Шветового конґресда РРЛ и представнїкох Орґанизациї Русинох зоз Москви.

 

Участвованє на першей такей манифестациї наявели и представнїки Покраїнскей влади АП Войводини зоз хторима ше делеґация Рускей матки тих дньох и стретла. Делеґацию, у хторей були Дюра Папуґа, Миломир Шайтош, Саня Тиркайло и Владо Джуджар, приял покраїнски секретар за културу, явне информованє и одношенє з вирскима заєднїцами Мирослав Штаткич и його заменїк Небойша Кузманович. Члени Рускей матки их поинформовали насампредз о историї и активносцох свойого здруженя, як и о статусу Руснацох нє лєм у Сербиї, алє и у осем других штреднєевропских жемох, Канади и ЗАД.

 

автор ядю 

 

Zdroj: http://www.ruskeslovo.com/