Petro Riznič Ďaďa, dolu jak glumec u "Eftajovej dzivki" G. Kosteľnika

Петро Ризнич Дядя, долу як ґлумец у ”Єфтайовей дзивки” Г. Костельника

На нєшкайши дзень, 12. фебруара 1966. року умар Петро Ризнич Дядя, наш визначни театрални ентузияста, ґлумец и режисер, подобови уметнїк и просвитни роботнїк.
 
Петро Ризнич Дядя жил у Руским Керестуре и Вербаше, преподавал подобове вихованє у ґимназиї, а Руснацом на тих просторох до нашлїдства зохабел свойо вельке анґажованє у театралним живоце. Перше медзи двома шветовима войнами по наших, алє и других местох основал вецей дилетантски драмски ґрупи, хтори потим преросли до аматерских, а сон му бул снованє єдного стаємного руского треатру.
 
Петро Ризнич народзени 28. априла 1890. року у Брацлаве, у України, дзе ше уж як 15-рочни ґимназиялєц аматерски почал занїмац з театром. Як гуторел, за свою першу озбильну роботу у театре раховал режию Шилеровей "Збойнїци" 1907. року, дзе и ґлумел главну улогу, а потим тоту роботу предлужел у Академским аматерским дружтве. У України, у рамикох КПД "Просвита", орґанизовал 280 драмски секциї по валалох.
 
Пре тедишнї револуцийни збуваня, 1919. року емиґровал до Югославиї, дзе театралну роботу предлужує перше у Дубровнику, а потим и у Бачкей, у Вербаше и других местох - по сербски и по руски. Так робел у Коцуре, Руским Керестуре, Надалю, Бечею, Сенти, Кули, нє лєм як режисер, алє и як хориста и руководитель фолклорних секцийох. За свойо представи вирабял сценоґрафию, декор, маски, часто и ґлумел, писал и адаптовал драмски тексти.
 
За 37 роки роботи у тедишнїх Югославийох Петро Ризнич Дядя поставел 226 театрални фалати, а през його руки прешли 1 175 аматере - ґлумци, танєчнїки и шпиваче. Попри за старших, у Керестуре бул снователь и бабкарского, дзецинского и театру за дзеци.
 
До остатнього дня бул на сцени, бо є до шпиталю у Вербаше однєшени з проби театралного фалата "На дну" Максима Горкого у Руским Керестуре, дзе умар ютредзень, 12. фебруара 1966. року. Поховани є на вербаским теметове, а йому на памятку од 1969. року отримуєме Драмски мемориял Петра Ризнича Дядї, а од 1970. року на чесц того велїкана нашого театру основани перше Аматерски, потим Руски народни театер з його меном.

автор:  зам/рнс