Pidporne pysmo Svitovoj rady Rusyňiv Vlaďi Ukrajiny...

Підпорне письмо Світовой рады Русинів Владі Україны
перед вступом країны за члена Европской унії

Світова рада Русинів (Руснаків/Лемків) у повній мірі підтримує намаганя Влады і депутатів Верховной рады Україны у творіню договорів і їх залучіня до діятельства потрібных кроків, якы поведуть до приятя Україны за члена Европской унії.

Тоты вызначны і сістематічны крокы вымагать сучасна сітуація, жебы ся вшыткым жытелям Україны, в тім чіслі і Русинам, одкрыли можливости про перспектівный розвиток. А то главні в економічній, але і в другых областях цілкового наповньованя людьскых прав, котры ся днесь запроваджують у членьскых державах Европской унії.

Із підпорным письмом підтримованя започатой роботы іщі раз підкреслюєме потребу вызнаня Русинів в Україні як окремого народа, односно меншинового народностного складу Україны, як є установлено Европскыма договорами і Хартами, і як тоты документы дотримують державы в Польску, Чеську, Словеньску, Мадярьску, Румунії, Хорватьску і в Сербії.

Так само жадаме вытворити простор на повноправный розвиток Русинів на Україні, окремо в области освіты, културы, пресы і урядового вжываня русиньского языка словом і письмом в рамках Европской харты о реґіоналных або меншиновых языків. Даны права выпливають із Закона о основах державной языковой політікы на Україні (No. 5029- VI), прияты Верховнов радов Україны 3. юла 2012 р., якы підписав і презідент Україны Віктор Янукович 8. авґуста 2012 р. вєдно з Европсков хартов о реґіоналных або меншиновых язиках, котру підписала і держава Україна.

Тоты вымогы Світовой рады Русинів ухвалив і XII. Світовый конґрес Русинів (Руснаків/Лемків), зреалізованый 12.-14. юла (07.) 2013 р. в Мукачеві, Ужгороді і Сваляві на Україні, де было делеґатами ухвалено Проголошіня о правах Русинів на Україні (головно на Підкарпаті) на слободне выясньованя перед переписом жытельства на Україні і цілкове вызнаня ідентічности Русинів із вшыткыма правами, якы выпливають з европскых документів.

В змыслі такого поступу і дотриманя єствуючіх Европскых договорів і Харт Світова рада Русинів (Руснаків/ Лемків) підтриме намаганя Влады і депутатів Верховной рады Україны, якы приведуть Україну до членства Европской унії з повноправным і демократічным розвитком народностных маншын, в тім чіслі і Русинів.

Новини Закарпаття

Zdroj: http://transkarpatia.net/transcarpathia/our-news/23409-pdporne-pismo-svtovoy-rady-rusinv.html