Pismo deputatom Ukrajini

З нагоди початку розправи у Парламенту України и уводзеня до процедури Закона о основох державней язичней политики, односно маншинских и реґионалних язикох у України, медзи хторима и русински язик, предсидатель Шветовей Ради Руснацох/Русинох/Лемкох (РРЛ) Дюра Папуґа упутел писмо подзекованя депутатом Верховней Ради України у хторим ше, медзи иншим, гвари:

- Визначуєме потребу же би Закон о основох державней язичней политики у України, з установйованьом державного язика и 18 регионалних, лєбо меншинских националних язикох у України, медзи хторима и русински язик, бул цо скорей и урядово принєшени.

Русински язик ше нєшка службено хаснує у векшини штредньоевропских жемох у хторих жию Русини/ Руснаци/Лемки, применююци шицки одредби Европскей повелї о реґионалних, лєбо меншинских националних язикох. Так то у Польскей, Ческей, Словацкей, Мадярскей, Сербиї, Горватскей и Румуниї, а до тераз то нє було так лєм у України.

Папуґа у писму визначел и же високошколски установи на хторих нєшка мож студирац русинистику уж вецей децениї постоя у Новим Садзе у Сербиї, у Прешове у Словацкей, у Кракове у Польскей и у Нїредьгази у Мадярскей.

На концу, Папуга поинформовал депутатох же нарок, у юнию 2013. року, у Мукачове и Сваляви на Подкарпатю у України будзе отримани 12. Шветови конґрес РРЛ, на хтори поволал и представительох Парламенту України.

(конєц) мсл