Pismo podzekovaňa deputatom Verchovnej rady Ukrajiny

Писмо подзекованя депутатом Верховней ради України

На шветочносци з нагоди Дня нєзависносци України, хтора стреду, 5. септембра орґанизована у Амбасади України у Беоґрадзе, предсидатель Шветовей ради Руснацох/Русинох/Лемкох Дюра Папуґа амбасадорови України у Сербиї Викторови Недопасови придал Писмо подзекованя депутатом Верховней ради України  з нагоди нєдавного приношеня Закона о основох державней язичней политики.

Предсидатель ШР РРЛ Дюра Папуґа першираз присуствовал на приєму з нагоди нєзависноци України у Амбасади України, а Писмо подзекованя будзе прешлїдзене депутатом Верховней ради до Києва и глаши:

- Почитовани депутати Верховней Ради України, посиламе Вам Писмо подзекованя з нагоди приношеня Закона о основох державней язичней политики у України, хтори сце вигласали 3. юлия 2012. року. Источашнє визначуєме окремне значенє Закона о основох державней язичней политики у України, зоз установйованьом державного язика и 18 реґионалних або меншинских язикох у України, медзи хторима и русински язик, хтори после урядового приношеня у Парламенту України, 8. авґуста 2012. року подписал и Предсидатель України Виктор Янукович.

- Русински язик нєшка ше урядово хаснує у векшини европских жемох у хторих жию Русини/Руснаци/Лемки, применююци шицки одредби Европскей повелї о реґионалних або меншинских язикох. Так то у Польскей, Ческей, Словацкей, Мадярскей, Сербиї, Горватскей и Румуниї, а по тераз так нє було лєм у України.

- Високошколски установи на хторих нєшка мож студирац русинистику уж вецей децениї постоя у Новим Саду у Сербиї, у Прешове у Словацкей, у Кракове у Польскей и у Нїредьгази у Мадярскей.

- З нагоди приношеня Закона о основох державней язичней политики у України, Шветова рада Русинох/Руснацох/Лемкох и Крайове Товаришство Подкарпатских Русинох од 12. по 14. октобер 2012. року у Мукачеве орґанизує Културну програму - Перши Медзинародни дзень русинскей култури, у рамикох хторей будзе отримана и Сновательна Скупштина Асоцияциї Русинских Подобових Творительох - АРТПОТ.

- Источашнє, жадам Вас поинформовац же наступни, 12. Шветови конґрес Русинох/Руснацох/Лемкох будзе отримани у юнию 2013. року у Мукачеве и Сваляви, на Подкарпатю у України. Будзе нам мило привитац Вас на тих манифестацийох - поведзене у Писму подзекованя депутатом Верховней ради України, хторе 5. сепетембра предсидатель ШР РРЛ Дюра Папуґа придал амбасадорови України у Сербиї.

(конєц) зам