Plesová sezóna Rusínov v Srbsku

Почала сезона балованя
З найстаршим керестурским балом - Майсторским, всоботу, 23. януара, у Руским Керестуре почала тогорочна сезона балованя, а истого дня отримани и традицийни "Прадки" - як бал просвитних роботнїкох Руского Керестура.

Майсторски бал и того року орґанизовало рускокерестурске Здруженє ремеселнїкох и приватних привреднїкох, а бал, котрому попри домашнїх присуствовали и госци з других местох, отримани у Ресторану "Лонґов" при базену.
 

Прадки у керестурскей ОШиҐ "Петро Кузмяк" були окреме нащивени, а того року мали и медзинародни характер, понеже Прадком у Школи присуствовали и госци з Миклошевцох, зоз Горватскей, як и др Валерий Падяк з Ужгороду, з України.
 

Миклошевчанє, аматере и представителє КУД “Яким Ґовля”, на Прадкох у Школи ше з домашнїма дружели после отриманого цаловечаршого концерту у Велькей сали керестурского Дома култури.
 

Валерий Падяк з Ужгороду, иншак и оцец школяра керестурскей Ґимназиї и визначни русински активиста, з тей нагоди директорови керестурскей Школи придал портрет Петра Кузмяка, чийо мено Школа ноши, а з колекциї "100 визначни Руснаци" визначного маляра з України Василя Скакандия.

Як и скорейших, и того року на Прадкох служени традицийни руски єдла хтори пририхтали кухаре керестурскей Школи "Петро Кузмяк", та госци мали нагоду коштовац три файти мачанки - капусну, парадичову и билу (млєкову), печену капусту, колбасу, месо, капущанїки, белюши, ґоргелї, череґи...
 

Попри просвитних роботнїкох Школи, та дзепоєдних просвитних роботнїкох у пензиї, Прадком присуствовали и поволани госци, а Прадки и того року отримани у орґанизациї школского синдикату.
 

(конєц) зам