Pliškova: Začinať s’a nova etapa vŷsokoškoľskoj rusynistikŷ

Vŷsokoškoľska rusynistika na Slovakiji od 28-ho avgusta 2018-ho roku začinať pysaty svoju novu istoriju. Іnformovala o tim Anna Pliškova, dyrektorka Іnštitutu rusyňskoho jazŷka i kulturŷ Pr’ašivskoj univerzitŷ v Pr’ašovi, de v tot deň obhajiv svoju dizertačnu robotu Mychal Pavlič.

Pavlič obhajovav svij doktorat po absolvovaňu novoho 4-ričnoho doktor’skoho študijnoho programu Slavistika – rusyňskŷj jazŷk i literatura, jakŷj Pr’ašivska univerzita začala realizovaty od akademičnoho roku 2014/2015. Novŷj absolvent naležŷť medži peršŷch tr’och študentiv pryjatŷch na totŷ študiji i je jednočasno peršŷm, kotrŷj jich zakinčiv.

Mychal Pavlič obhajiv svoju doktor’sku robotu iz rusyňskoj literaturŷ. Robotu z nazvov Rusyňska identita jak literaturna problema (Pohľadŷ na rusyňsku literaturu na Slovakiji po roci 1989) napysav pid mentorstvom Petra Kašŷ, kotrŷj je v sučasnosty odbornŷm garantom študijnoho programu Slavistika – rusyňskŷj jazŷk i literatura na Pr’ašivskij univerziti.

Peršŷj absolvent všŷtkŷch tr’och programiv
„Vŷňatkovosť obhajobŷ dizertačnoj robotŷ Mgr. Mychala Pavliča ne je lem u tim, že s’a realizovala v roci, koly vŷsokoškoľska rusynistika na Slovakiji slavyť svoju 20-tu ričnic’u, kotru ІRJaK PU sobi prypomjane poserednyctvom medžinarodnoj naučnoj konferenciji 18-ho až 19-ho oktobra 2018-ho roku, ale holovno v tim, že avtor dizertačnoj robotŷ je istorično peršŷm absolventom všŷtkŷch tr’och vŷsokoškoľskŷch programiv zamir’anŷch na rusyňskŷj jazŷk i literaturu – bakalar’skoho (2009 – 2012), magister’skoho (2012 – 2014) i doktor’skoho (2014 – 2018). Vďaka uspišnomu absolvovaňu 10-ričnoho kontinualnoho študija rusyňskoho jazŷka i literaturŷ na Pr’ašivskij univerziti, kotra jak jedyna v sviti realizuje všŷtkŷ 3 vŷsokoškoľskŷ programŷ zamir’anŷ na rusyňskŷj jazŷk i literaturu, do karpatorusynistikŷ postupno začnuť vstupaty molodŷ i nadijnŷ kvalifikovanŷ rusynistŷ, što je vŷslidkom 20-ričnoho procesu rozvoja vŷsokoškoľskoj rusynistikŷ v Slovakiji i rusyňskoho narodno-vozrodnoho procesu po roci 1989,“ informovala Pliškova.

Chto je Mychal Pavlič
M. Pavlič s’a narodyv u Pr’ašovi v roci 1989. Absolvovav Seredňu elektrotechničnu školu v Pr’ašovi. V roci 2009 prodovžovav študiji na Pr’ašivskij univerziti, de sobi vŷbrav učiteľskŷ programŷ – slovac’kŷj jazŷk i literatura i rusyňskŷj jazŷk i literatura. Po absolovaňu bakalar’skoho i magesters’koho študija, keďže inklinovav ku rusyňskomu jazŷku i literaturi, nastupyv na rusyňskŷj inštitut jak internŷj doktorand.

Jak doktorand regularno vŷstupav na naučnŷch seminarach karpatorusynistikŷ, organizovanŷch ІRJaK PU, de analizovav literaturnŷ tvorŷ holovno sučasnŷch rusyňskŷch avtoriv. Vŷslidkom toj robotŷ suť joho publikaciji v naučnŷch zbornykach ІRJaK PU (Studium Carpato-Ruthenorum) i v naučno-popularnŷch periodikach (časopys Rusyn). Okrem toho iniciativno pomahav u organizovaňu naučnŷch, edukačnŷch i propagačnŷch akcij ІRJaK PU. Zalužnu robotu zrobyv i robyť v procesi budovaňa Bibliotekŷ karpatorusynistikŷ ІRJaK PU.

Pavlič je tak samo členom odbornoj porotŷ Literaturnoho konkurzu Mariji Maľcovskoj (od roku 2015), dale členom vŷboru Sekciji pro pervistnu literaturu Literaturnoho fondu (od roku 2018) a v poslidnich tr’och rokach je i redaktorom literaturnoho dodatku časopysu Rusyn – Pozdravliňa Rusyniv.

PETRO MEDVІĎ