Počal "Kremenec 2011"

Почал “Кременєц 2011”
ШВЕТОВИ КОНҐРЕС РРЛ - МЛАДИ
На гори Кременєц нєшка почало Штварте младежске интерреґионалне стретнуце “Кременєц 2011”. Стретнуце ше отримує на тромедї Словацкей, Польскей и Закарпатскей обласци України.

На тим месце ше сходза хотари историйних карпаторусинских реґионох - Прешовскей Руси, Лемковини и Подкарпатскей Руси, так же од початку орґанизованя тих стретнуцох, їх мото “Карпатски Русини - єден нєроздзелїви народ”.

Акцию орґанизую Шветови конґрес Руснацох/Русинох/Лемкох (РРЛ) и Шветови форум русинскей младежи, так же 16. и 17. юлия, на верху гори Кременєц, на тисяч 221 метеру надморскей висини, у програмох Стретнуца участвую млади и други зоз жемох-членїцох Шветового конґресу и Шветового форуму - зоз Мадярскей, Сербиї, Польскей, України, а найвецей зоз Словацкей - осемдзешацецеро и з Ческей - трицец особи.

На Стретнуце на гори Кременєц вчера одпутовала и делеґация Руснацох зоз Сербиї, котру творя предсидатель Рускей матки (РМ) и Шветовей ради РРЛ Дюра Папуґа, предсидателька Форуму младих РМ и подпредсидателька Шветового форуму русинскей младежи Биляна Дудаш, предсидателька Асоцияциї русинских новинарох Єлена Перкович, як и член РМ з Вербасу Владимир Бильня.

(конєц) зам