Pochovani vladika Slavomir Miklovš

В соботу, 23. юлия, у Катедралним храме св. оца Миколая у Руским Керестуре поховани преосвящени кир Славомир Микловш, Крижевски владика у  пензиї.

Обряд хованя зоз Заупокойну Службу Божу почал у каплїци на теметове у Дюрдьове, у владиковим родзеним валалє, а закончени є пополадню у новозбудованей крипти при Катедралним храме у Руским Керестуре. Хованє предводзели апостолски еґзарх за грекокатолїкох у СЧГ преосвящени владика кир Дюра Джуджар и владика Крижевски, кир Нино Кекич.

Пред виложену труну у Катедралней керестурскей церкви, з нїма сослужели митрополит Заґребски, кардинал Йосип Бозанич и апостолски нунций у Сербиї, архиепископ Орландо Антонини. Сослужели ище штирме грекокатолїцки владикове - Керестеш з Гайдудороґу з Мадярскей, Бабяк з Прешова и Руснак з Братислави зоз Словацкей, Стоянов з Македониї, як и троме римокатолїцки владикове - митрополит Беоґрадски, архиепископ Хочевар, владика Суботицки Пензеш и владика Сримски Ґашпарович. 

Владику ховали и вецей як коло 60 священїки з цалого Крижевского владичества и нашого апостолского еґзархату, алє и з Македониї, зоз Словацкей, та з України, Белґиї, Канади, Риму, як и священїки латинского обряду з вецей местох.  Зоз шпиваньом, обряд хованя провадзела владикова блїзка родзина - священїцка фамелия Холошняйових з Дюрдьова.

Попри владиковей родзини, на хованю присуствовали и числени монахинї, представителє Руху фоколарох, вирни и владиково приятелє з рижних местох и крайох. На концу, од покойного владику ше одпитал насампредз владика Крижевски, кир Кекич, алє и други владикове.

Вєдно з хованьом владики Славомира, всоботу окончени и обряд препохованя наших штирох владикох - Дионизия Нярадия, Гавриїла Букатку, Йоакима Сеґедия и Йоакима Гербута, чийо посмертни остатки з Катедралней церкви пренєшени до новей крипти при Соборним храме.

Як з тей нагоди наглашел наш еґзарх, преосвящени владика кир Дюра Джуджар - од тераз, там вєдно спочиваю шицки пейцме нашо владикове, як слупи нашей Церкви на тих просторох.

(конєц) маф