Podpisani protokol o sotrudňictve rusinskich stranok

 

Подписани протокол о сотруднїцтве русинских странкох

Предсидателє Русинскей демократскей странки (РДС) зоз Сербиї Мирослав Бесерменї и странки Наш край (НК) зоз Словацкей Люба Кральова, прешлей соботи у Снїни подписали Протокол о сотруднїцтве.

Протокол о сотруднїцтве двох политичних странкох котри зазберую Русинох подписани на основи скорейших догваркох. РДС зоз Сримскей Митровици основана 2006. року, а странка НК, зоз шедзиском у Прешове, 2010. року, з найвекшей часци ю основали припаднїки русинскей меншини у Словацкей, а до своїх шорох зазберує и заклада ше за витворйованє правох националних меншинох восточней Словацкей.

Протокол о сотруднїцтве РСД и НК подписани 7. мая, у присустве найвисших представительох з обидвох странкох. З нагоди нащиви делеґациї РСД зоз Сримскей Митровици, на чолє з єй предсидательом Мирославом Бесерменьом, домашнї у Словацкей орґанизовали богату програму, та стретнуца и розгварки з представителями церкви, уметнїками и другима.

У сердечних стретнуцох з домашнїма, госци зоз Сербиї упознати зоз статусом меншинох у Словацкей Републики, о положеню русинскей меншини, бешедоване о дзепоєдних подобних проблемох, алє и конкретних дальших крочайох у медзисобним сотруднїцтве, як двох странкох, так и Русинох з двох жемох.  

Як за Рутенпрес гварел Мирослав Бесерменї, найвецей бешедоване о помоци странки Наш край Руснацом у Сербиї у приступу ґу бенефитом Европскей униї, так же и сотруднїцтво тих двох странкох будзе єден з мостох на нашей драги ґу ЕУ.

Як гварела Кральова, мобилозованє сонароднїкох и придружованє Русинох у Словацкей ґу странки котрей є на чолє барз значне за будучносц Русинох, док Бесерменї, после подписованя Протоколу о сотруднїцтве, наглашел же история указала же ми Руснаци нє маме нїкого другого, крем самих себе. Шицко друге, чиста калкулация, гварел Бесерменї у Снїни.

Госци зоз Сербиї упознати з активносцами русинских орґанизацийох, а окреме странки НК на популаризованю попису жительства у Словацкей, котри почнє того мешаца.

Обидва странки ше позарядово закладаю за масовне одволанє нашого народу, за самопрепознаванє и вияшньованє як Русини, бо то значни крочай за нашу будучносц, обстоянє и розвой. Якй гварел Бесерменї, искуства Русинох у Словацкей вязано за активносци на терашнїм попису, буду помоц и Руснацом у Сербиї, пред пописом жительства, на єшень того року.

Як догварене, после попису жительства у Словацкей, представнїки странки Наш край нащивя Русинску демократску странку у Сербиї.

(конєц) зам