Pomer Jaroslav Sabol

НОВИ САД - ИН МЕМОРИАМ
Умар Ярослав Сабол

Штварток вечар, 25. фебруара, у Новим Садзе нєсподзивано умар Ярослав Сабол, подпредсидатеь Националного совиту Руснацох и визначни дружтвени и културни роботнїк Руснацох у Сербиї.

Ярослав Сабол народзени 29. юлия 1951. року у Шидзе, дзе закончел основну школу и ґимназию.

После штредньошколского школованя у Шидзе, Ярослав Сабол 1975. року дипломовал на Факултету политичних наукох у Беоґрадзе – Оддїлу за журналистику, и бул єден з перших школованих новинарох медзи Руснацами у тедишнєй Югославиї.

Першу роботу, як новинар, достал як стипендиста Радио телевизиї Нови Сад, у Редакциї програми на руским язику.

Од 1980. року робел у Новинско-видавательним подприємстве "Роботнїцка преса" ("Радничка штампа") у Беоґрадзе, у дописовательстве за Войводину, одкаль, пре хороту, одходзи до пензиї 1998. року.

Под час студийох, Сабол бул дописователь "Руского слова" и беоґрадских новинох: "Вечернє новости", "Борба" и "Спортске новости".

Як новинар, Ярослав Сабол достал награди Союзу синдикатох Войводини, Сербиї и Югославиї.

Ярослава Сабола будземе паметац и по вельким, и нєсебичним позарядовим анґажованю у руским явним, културним и дружтвеним живоце на уровню цалей нашей заєднїци у Сербиї, а окреме при и за Руснацох у Новим Садзе и Шидзе.

Свой шлєбодни час, знанє и схопносци Ярослав Сабол барз вельо укладал на анґажованє у роботи Рускей матки Сербиї, бул член єй орґанох, делґат и учашнїк Шветових Конґресох РРЛ, од 2002. року бул и подредсидатель Рускей матки, як и предсидатель Городского одбору Рускей матки Нови Сад.

За члена Националного совиту Руснацох вибрани є 2004. року, дзе мал функцию подпредсидателя Националного совиту Руснацох у Сербиї, окрем задлуженого за информованє. Тоту функцию окончовал до конца живота.

Ярослав Сабол бул снователь Фестивала монодрамох и дуодрамох у Новим Садзе, а єден є спомедзи сновательох Фестивала тамбуровей музики "Мелодиї руского двору" у Шидзе.

Його активносц була замеркована и у новинарских орґанизацийох, дзе бул член Предсидательства Дружтва аґрарних новинарох Войводини.

Попри велїх своїх активносцох, дзе у каждей давал цалого себе, Ярослав Сабол бул и активни член городского Каритасу у мено новосадскей парохиї.

Подпредсидатель Националного совиту Руснацох Ярослав Сабол будзе поховани нєшка, 27. фебруара (на 12,45 г) на Новим теметове у Новим Садзе, а од своїх наймилших, за собу у жалосци зохабел супругу и дзивку.

(конєц) зам