Popis žiteľoch na rok u apriľu

 

Попис жительох на рок у априлу
Попис жительох Сербиї будзе отримани од 1. по 15. април идуцого року, наявене у Оддзелєню за попис жительства Републичного заводу за статистику. У Сербиї будзе традицийни попис - з методу интервюа, а буду го окончовац за тото обучени коло 60 000 анкетаре - 48 000 пописоваче, 6 500 општински инструкторе и  1 500 општински контролоре.
 

Як гварела началнїца того оддзелєня Снежана Лакичевич, пописоваче буду мац шицки потребни ознаки и леґитимациї з фотоґрафию, печацом и подписом, як и овласценє за роботу, та их гражданє годни препознац. Лакичевичова визначела же шицки податки буду тайни и похасновани лєм за статистику, так же най гражданє вияви даваю без обаваня, и податки о нїх нє буду нїяк злохасновани. Прелиминарни резултати буду обявени 15. мая идуцого, а конєчни резултати попису у фабруаре 2012. року и сукцесивно, по децембер 2013. року.
 

У интервюю буду и нови питаня, хтори до тераз нє поставяни, а одноша ше на инвалидитет, информатичну писменосц и питанє звонкамалженских заєднїцох. Буду поставени и питаня о образовних и економских характеристикох, жридлох финансийох за живот и средствох за путованє на роботу, лєбо до школи.

Будзе преширени и блок з питанями о миґрацийох, за особи хтори жили у иножемстве.
За попис жительства буду обезпечни 2,7 милиярди динари, цо вельо менєй як у жемох у реґионє. У складзе з медзинароднима предписанями, з пописом по першираз буду облапени и гражданє хтори нє маю сталємну, лєбо дочасову адресу, односно особи котри хасную услуги прилапююцих центрох.
 

(конєц) ад