Porichtac še na popis žiteľstva u Ukrajiňi

Порихтац ше за попис жительства у України

Закон о державней язичней политики у України, з хторим припознати и русински язик як реґионални, лєбо язик меншини, барз позитивно привитани на Подкарпатю, аж у медзичаше звекшане и число русинских орґанизацийох у Закарпатскей обласци України, дознава Рутенпрес од предсидателя Шветовей ради Руснацох/Русинох/Лемком (ШР РРЛ) Дюру Папуґу, после схадзки Ради, хтора 13. октобра отримана у  Мукачеве, на Подкарпатю у України.

На Пиятим зашеданю Ради присуствовали шицки 10 члени зоз жемох-членїцох Шветового конґресу РРЛ, а як гварел Папуґа, число реґистрованих русинских орґанизацийох на Подкарпатю з 29, тераз урядово звекшане на 35, а ище 6 рижни орґанизациї з русинским предзнаком у пририхтованю за реґистрованє у Закарпатскей обласци. На ШР бешедоване и о можлївосцох снованя одредзеней асоцияциї русинских оґанизацийох, як їх свойофайтового обєдинююцого цела.

У Мукачеве бешедоване и о попису жительства у України, хтори у тей жеми будзе отримани на рок, та у напряме кампанї на пропаґованю же би ше Русини шлєбодно так и вияшньовали, предложене най превежню модел Русинох у Словацкей, односно Русинскей оброди, и орґанизую подобни акциї пред пописом жительства у України, односно єй Закарпатскей обласци.

До Державней комисиї (комитету) за статистику України ШР пошлє вимогу же би у будуцих пописних лїсткох, Русини були видвоєни як окремна меншинска национална заєднїца, а на основи спомнутого Закона о державней язичней политики.

Дванасти Шветови конґрес РРЛ у юнию 2013. року будзе отримани у України, у Мукачеве и Сваляви, а конкретни термин його отримованя будзе утвердзени на шлїдуюцей схадзки Ради, у Праги 15. и 16. децембра. На предлог Комисиї за историю Конґресу, наступни Конґрес будзе пошвецени 210-рочнїци народзеня Александра Духновича.

Як догварене на схадзки Ради у Мукачеве, од идуцого року главни орґанизатор проєкту Пендранє на гору Кременєц (на тромедї України, Словацкей и Польскей) будзе Шветови форум русинскей младежи, а до конца того рока би мали висц ище три числа часопису „Глас Русина”.

З планованих штирох, до тераз вишло єдно, а на Ради заключене же би, попри главного редактора часопису, за кажду жем-членїцу Конґресу, односно тексти з тей жеми, бул одредзени по єден редактор.

ШР бешедовала и о активносцох русинских орґанизацийох до конца того рока, як и своїх, дзе, медзи иншим, 9. новембра будзе отримана и програма Русинох Румуниї, у Бая Маре. 

(конєц) зам