Povolanka do Združeňa Keresturoch

Поволанка до Здруженя Керестурох
Руски Керестур вчера нащивел предсидатель Здруженя Керестурох и городоначалнїк Балатон Керестура у Мадярскей Йозеф Ковач, котри особнє поволал Руски Керестур же би ше приключел до того здруженя местох котри у своїм мену маю Керестур. Здруженє Керестурох урядово основане 2001. року, а перше стренуце местох котри маю мено Керестур отримане 1999. року, праве у Балатон Керестуре, док соснователь Здруженя бул и Бодроґ Керестур, тиж з Мадярскей.
 

У Здруженю тераз урядово 19 места, док, як вчера гварел Йозеф Ковач, у штреднєй Европи єст 41 место котре у своїм мену ма Керестур - у Мадярскей, Румуниї Словацкей, України, у Австриї, Словениї, як и у Сербиї два - Руски Керестур и Керестур у Банату. Каждого року ше отримує стретнуца Керестурцох, вше у другим месце, а контакти керестурскей Месней заєднїци зоз Здруженьом Керестурцох почали пред даскельома роками, же би вчера предсидатель того Здруженя и особнє поволал представительох Руского Керестура же би ше наш Керестур придружел до того членства.
 

Домашнї у Руским Керестуре городоначалнїкови Балатон Керестура були подпредсидатель Совиту Месней заєднїци и предсидатель Дочасово орґану Општини Кула Желько Ковач, секретар МЗ Йоаким Надь, та директор Дому култури Йоаким Рац.

Пан Йозеф Ковач вчера пред вечаром нащивел керестурску Катедралну церкву и Школу „Петро Кузмяк” дзе му домашнї були парох о. Михайло Малацко и директор Школи Янко Хома, та и од нїх и од других домашнїх дознал дацо вецей о нашим бачким Керестуре.

Урядову поволанку о учленьованю до того интересантного Здруженя Керестурох пошвидко будзе розпатрац Совит Месней заєднї      ци, та принєше и одлуку чи поволанка будзе прилапена.

(конєц) зам