Predlog Zakona o nacionalnych sovitoch na Vladi Serbiji

Предклад Закон о националних совитох националних меншинох прилапени штварток на схадзки Влади Сербиї, и по хитним поступку є упутени до скупштинскей процедури.

Зоз тим Законом, як виявел министер за людски и меншински права у Влади Сербиї, Светозар Чиплич, конєчно дефиновани уставни права национални меншинох и утврдзена процедура вибора националних совитох их надлєжносц, финансованє и маєток.

Вон наглашел же кед Народна Скупштина прилапи Закон, меншини годни запровадзиц виберанки, и постац состойна часц державней орґанизациї. Припаднїки националних заєднїцох сами буду водзиц старосц о о своїх меншинских правох, цо сушносц меншинскей самоуправи.

На вистку о прилапйованю предкладу Закона о националних совитох новосадскому "Дневнику" вияву дала Ана Томанова-Маканова, подпредсидателька Вивершней ради и покраїнска секретарка за информациї котра гварела же "уж бул час же би предклад закона о националних совитох пришол на шор за прилапйованє, понеже мандати националним совитом давно вишли". По єй думаню "тот законски предклад добри и вон унапредзи живот националних заєднїцох у Сербиї".

Предложени закон медзи иншим предвидзує два способи виберанкох за члени националних совитох- директни на нєпоштредних виберанкох и индиректни прейґ електорох.

Лалсо Йожа, предсидатель Националного совиту националней заєднїци Мадярох у своєй вияви за "Дневник" гварел" же мадярска политична елита жада директни виберанки".

-Потребне направиц окремни виберанково списки мадярскей заєднїци а до нього муша буц уведзени вецей як 50 посто шицких полнолїтних гражданох мадярскей националносци, спрам статистичного числа котрому жридло предходни попис жительства, гварел Йожа.

По його словох, виберанково списки за директни виберанки за членох националних совитох будзе окончовац надлєжни державни орґани.

(конєц) єп