Predstavena tvorčosť mladych

У Заводзе за културу войводянских Руснацох вчера представена найновша Антолоґия литератури младих ґенерациї 1990-2010 "Дзеци з урбаного гумна" Юлияна Тамаша, хтору обявела НВУ "Руске слово", односно єй часопис МАК, як дзешату кнїжку у едициї МАКoff. Рецензенти и редакторе того виданя мр Борис Варґа и Ваня Дула, а о Антолоґи бешедовали автор, академик Юлиян Тамаш, редактор и рецензент Борис Варґа, директорка НВУ "Руске слово" Мартица Тамаш и директор Заводу Мирослав Кевежди.

У Антолоґиї заступени 33 млади авторе, у нашей явносци присутни коло 20 роки, алє були марґинализовани и з боку держави и з боку видавательох, понеже росли и творели у чежких войнових и транзицийних часох. Антолоґия пробує виправиц нєправду, пробує дац нагоду младим автором, пробує их потримац на чежкей драги твореня бо, як гварел Тамаш, од поезиї нє мож жиц, алє за поезию вредзи жиц. Борис Варґа визначел же му бул циль позберац тоту марґинализовану ґенерацию, же би ше нє страцела и же би була капча з руску литературу хтора у тим чаше обявйована.  Тиж так, Варґа визначел же ше идентитет у ґлобализациї нєшкайшого швета мултипликує, та є так нє лєм руски, алє од рускосци нє муши нїч анї страциц. То на даяки способ и наша будучносц. Мирослав Кевежди окреме похвалєл рамики кнїжки, хтори ноша вельку символику, як чежких часох, так и повязованя з нашима литературнима класиками.  Бо, як визначене, гоч млади мало читаю и знєважую ширши литературни контекст, цо иманентне каждей младосци, кед жадаю писац и зохабиц шлїд у рускей, або гоч хторей литератури, потребне же би знали дзе припадаю, на цо ше операю, хто їх предходнїки, хтори то литературни контекст у хторим творя. Бо, раз можебуц и вони буду класики.

Модератор промоциї Мирон Джуня представянє Антолоґиї водзел на нєконвенционални, интересантни способ, през розгварку, луцидно и з велїма диґресиями. На пияток, 17. децембра, Антолоґия литератури младих ґенерациї 1990-2010 "Дзеци з урбаного гумна" будзе представена и у Руским Керестуре.

(конєц) опс