Prehlašeňe 12. Švetoveho kongresu RRL

Преглашенє 12. Шветового конґресу РРЛ
На 12. Шветовим конґресу Руснацох/Русинох/Лемкох (ШК РРЛ), отриманим од 12. по 14. юлий у Мукачеве, Ужгородзе и Сваляви на Подкарпатю у України, медзи другима документами, делеґати вигласали и текст Преглашеня Конґресу о витворйованю правох Русинох на Подкарпатю у України на шлєбодне вияшньованє на наступним попису жительох у України и витворйованє правох на чуванє и пестованє власного русинского язика и писма и правох на очуванє русинского идентитету.
 
Як стої у Преглашеню, делеґати 12. ШК РРЛ вимагаю од найвисших державних орґанох у України же би у подполносци витворели условия и оможлївели шлєбодне вияшньованє шицких гражданох, а медзи нїма и Русинох на Подкарпатю, на предстояцим попису жительох. Тиж так, нєобходне припаднїком шицких меншинских националних заєднїцох у України оможлївиц витворйованє правох на чуванє и пестованє власного мацеринского язика и писма и правох на чуванє власного идентитета.
 
- Тоти права виходза зоз Закона о основох державней язичней политики у України, хтори у Верховней Ради України вигласани 3. юлия 2012. року, а хтори подписал Предсидатель України Виктор Янукович 8. авґуста прешлого року. Тиж, вони и на основи Европскей повелї о реґионалних або меншинских язикох, чий подписнїк и Република Україна.
 
- Крем права на шлєбодне вияшньованє на попису жительох, то подрозумює и права на образованє на власним мацеринским, у нашим случаю русинским язику, права на пестованє власней култури, права на информаванє през друковани и електронски медиї на реґионалним або меншинским, односно русинским язику и права на службене хаснованє язика и писма каждей меншинскей националней заєднїци.

- Делеґати 12. ШК РРЛ поволую шицких Русинох на Подкарпатю у України же би ше на предстояцим попису жительох шлєбодно вияшньовали як Русини, бо лєм так можу витвориц свойо права - гвари ше у Преглашеню Конґресу.

автор:  зам