Premiera u Ruskim narodnim teatru - "Pacient dochtora Frojda"

Премиєра у Руским народним театру - „Пациєнт дохтора Фройда”

Актере найновшей представи РНТ - „Пациєнт дохтора Фройда”

Внєдзелю вечар, 8. септембра, пред полну салу з публику, Руски народни театер (РНТ) „Петро Ризнич Дядя" у Руским Кересуре премиєрно виведол представу „Пациєнт дохтора Фройда" Миру Ґаврана, у режиї Владимира Надь Ачима.
 
Трочлени ґлумецки ансамбл у добрим ритме одбавел интересантну, колажну представу, добре обдуману у режийним поступку, дзе на сучасни способ обробена тема шалєнства, хторе вше настава у глави поєдинца. Вихасновани шицки технїчни можлївосци РНТ, дзе уклопени видео-бим, шветлосни ефекти и театер циньох (споза билого паравану). У представи одлично вихаснована музика „Пинк Флойда" - „Мур", нємецки шлаґери з часу пред Другу шветову войну, як и часци з филму Чарлия Чаплина „Вельки диктатор", хтори одлично укомпоновани до представи и даваю єй єдну сучаснєйшу, модернєйшу конотацию.
 
Ґлумецки трио - Славко Орос як „Сиґмунд Фройд", Александер Мудри як „Адолф Гитлер" и Ивана Дудаш як „Кристина", през гумор виприповедали приповедку о шалєнстве, хторе вше ма причиново-пошлїдкову вязу у дзецинстве поєдинца, у одрастаню и нєпорозуменю фамелиї, алє на лєгки, питки способ, бо гумор олєгчал публики „прелїґнуц" озбильнєйши теми нєреализованей любови и мержнї, авторитету, жажди за власцу и панованьом, насилству... Публика вецей раз наградзовала ґлумцох з аплаузами на отвореней сцени, а на концу представи достали громки аплауз.

автор: опс