Prezentovaňe gimnaziji po rusky

 
ПОДКАРПАТЄ (УКРАЇНА) - МЕДЗИНАРОДНЕ СОТРУДНЇЦТВО-ШКОЛА

Презентованє Ґимназиї по руски 
 

 У напряме презентованя можлївосцох и условийох школованя школярох з Подкарпатя у Руским Керестуре - у Ґимназиї по руски, директор ОШиҐ “Петро Кузмяк” Янко Хома 2. и 3. мая окончел вецей розгварки у местох Подкарпатя.
 

Розгварки окончени после змаганьох на Трецим медзинародним турниру младих Руснацох у Поляни коло Сваляви, на Подкарпатю у України, насампредз з директором ОШ у Поляни, котра чишлї коло 360 школярох.
 

Як догварене, найвирятнєйше у авґусту, єдна векша делеґация школярох и їх родичох з Поляни и околини, нащиви Руски Керестур и нашу Школу, пре директне упознаванє з условиями змесценя и школованя.

У орґанизациї Валерия и Милана Падякових з Ужгороду окончени и розгварки з вецей школярками и родичами на исту тему, а барз добри промотор керестурскей Ґимназиї и Руского Керестура бул и спомнути Милан Падяк, котри од того школского року школяр нашей Ґимназиї.
 

После тих розгваркох, барз можлїве же пецеро школяре з Подкарпатя у України, на єшень приду на школованє до керестурскей Ґимназиї.

Як гварел Янко Хома, будзе то историйни крочай за керестурску Школу, а у блїзкей будучносци, нашо чолнїки, вєдно з державнима орґанами, мали би винайсц можлївосци за доставанє медзинародного оддзелєня у керестурскей Ґимназиї.
 

(конєц) зам