Pridata vimoha Švetovej rady

Придата вимога Шветовей ради
Делеґация Шветовей ради Руснацох/Русинох/Лемкох (ШР РРЛ), на чолє з єй предсидательом Дюром Папуґом, пондзелок найвисшим державним орґаном України, у Києве придала вимогу же би Карпатски Русини були припознати як окремна национална меншина у України.

Писмена вимога придата Верховней ради (парламенту) України, односно єй Секциї за питаня права людзох, народносни меншини и медзинародни одношеня, и Влади України.
Гоч було наявене же делеґацию ШР РРЛ приме предсидатель Верховней ради України Володимир Михайлович Литвин, пре його обовязки того дня, 21. марца, до того нє пришло, алє як сообщела ШР, стретнуце одложене за даєден други термин.

Як поведзене у сообщеню, котре подписал предсидатель ШР Дюра Папуґа, “як єдно з найважнєйших питаньох, ШР трима урядове припознаванє Русинох як националней меншини у України. Україна остатня держава дзе жию Русини, котра нє припознава свою русинску популацию як меншину, з єй власним, уникатним язиком и културу”.

У напряме того припознаваня, член ШР зоз Сиверней Америки Джон Риґети бешедовал и з членом Українскей комисиї при Конґресу ЗАД, же би го поинформовал о тим проблему. Українска комисия орґан американского Конґресу котри ше занїма з питанями вязанима за Україну.

Як сообщене, у писмено придатей вимоги и вимаганє же би, з припознаваньом Русинох як окремней меншини, Україна оможлївела и їх вияшньованє як таких на попису жительства у тей жеми 2012. року, а  пре витворйованє їх права на просвиту, културу, информованє и хаснованє язика и писма, у рамикох европскей карти язикох.

Наглашене же Русини як национална меншина припознати у Польскей, Ческей, Словацкей, Мадярскей, Румуниї, Горватскей и у Сербиї, дзе маю права на виражованє свойого националного идентитету.

Вимога ШР урядово реґистрована у Канцелариї Верховней ради України и при Омбудсманови України и Рада тераз очекує дальши крочаї по тим питаню.

(конєц) зам