Prilapeni zviti, Rezolucia i Prehlašeňa

Прилапени звити, Резолуция и Преглашеня

Зоз Шветового конґресу РРЛ
Дванасти Шветови конґрес Руснацох/Русинох/Лемкох (ШК РРЛ) на закончуюцим пленарним зашеданю внєдзелю, 14. юлия, прилапел звити матичних орґанизацийох Конґресу, як и звити комисийох Конґресу, дознава Рутенпрес од портпарола Рускей матки Миломира Шайтоша.
 
Принєшена Резолуция 12. ШК РРЛ, Преглашенє о витворйованю права подкарпатских Русинох на шлєбодне вияшньованє на наиходзацим попису жительства у України и права на припознанє и пестованє власного русинского язика и писма и права на припознанє русинского идентитету. Попис жительства у України будзе на яр 2014. року.

Конґрес принєсол и Преглашенє хтора будзе послата парламенту Польскей и до Совиту Европи, же би Акцию „Висла", у хторей после Другей шветовей войни Русини/Лемки насилно виселєни зоз своєй виковней териториї до рижних крайох Польскей, преглашел за нєзаконїти чин. Тиж так, Конґрес принєсол и Преглашенє з хторим ше вимага же би на Високей школи за учительох у Нїредьгази, у Мадярскей, бул врацени дакедишнї статус Катедри за русински язик. Преглашеня и заключеня Конґресу состойна часц його Резолуциї.
 
Пре одредзени технїчни причини, Конґрес тераз до членства нє приял и єденасту орґанизацию - Медзиреґионалне „Здруженє Русинох" з Москви, з Русийскей федерациї. Орґанизация хтора пред штирома роками дала вимогу за приєм до членства у ШК РРЛ у медзичаше транформована и тераз ма другу назву, так же кандидатуру муши поднєсц тота нова орґанизация, одлучене на Конґресу.
 
На закончуюцим пленарним зашеданю одлучене же шлїдуюци Конґрес 2015. року будзе отриманиї у Румуниї, у Переґу Маре, а домашнє будзе Културне товаришство Русинох Румуниї.

автор:  зам