Pririchtovaňa za naščivu z Poľskej i za Švetovi kongres RRL

Пририхтованя за нащиву з Польскей и за Шветови конґрес РРЛ

На схадзки Управного одбору Рускей матки (РМ), хтора всоботу, 13. априла отримана у Руским Керестуре, утвердзени деталї наступней нащиви студентох з Польскей, з Оддзелєня за русинистику на Педаґоґийней академиї у Кракове и делеґациї Здруженя Лемкох з Польскей Руснацом у Руским Керестуре, Новим Садзе и Коцуре, хтора будзе од 18. по 21. април.

Студенти з Польскей, котрих водзи професорка Олена Дуц-Файфер, попри местох у Войводини нащивя и наших у Републики Горватскей. Предвидзене же под час нащиви обиду шицки репрезентативни руски институциї и орґанизациї на тих просторох, а як визначел предсидатель РМ Дюра Папуґа, намира и же би з тоту нащиву, хтору орґанизує Матка, студенти з Польскей упознали нашу цалосну образовну вертикалу дзе ше наставу од оводи по факултет окончує по руски.

Под час нащиви, на Оддзелєню за русинистику Филозофского факултету у Новим Садзе професорка Дуц Файфер и професор Михайло Фейса отримаю преподаванє „Вариянти русинского язика у Польскей/Лемковини и у Сербиї/Войводини", хторе будзе 20 априла.
 

З тоту схадзку РМ почала и конкретни пририхтованя за участвованє на наступним, Дванастим Шветовим конґресу Руснацох/Русинох/Лемкох, (РРЛ), хтори того року од 12. по 14. юлий будзе отримани у Мукачове и Сваляви на Подкарпатю, у України. РМ почала пририхтовац звити конґресних комисийох зоз шейсц обласцох, бешедоване о можлївих делеґатох и госцох РМ на Конґресу, як и о представительох Форуму младих РМ, котри у исти час там буду участвовац на Шестим Шветовим форуму рускей младежи.
 

Як гварел Дюра Папуґа, Шветови конґрес будзе отримани на Подкарпатю у України як знак потримовки тамтейшим Карпаторусином же би ше шлєбодно национално вияшньовали на наступним Попису жительства, хтори у тей жеми будзе отримани у октобре и новембре 2013. року. Папуґа наглашел же наступни Конґрес будзе орґанизовани у сотруднїцтве з власцами - Владу и Верховну раду України, державни власци України и финансийно помогню орґанизованє Конґресу, а на нїм буду присустни їх урядово представителє.
 

На схадзки Управного одбору РМ бешедоване и о вименкох Статута Шветового конґресу РРЛ, а длугорочни визначни член РМ Владимир Дудаш з Руского Керестура, котри и подпредсидатель РМ задлужени за информативну и видавательну дїялносц, наявел же ше по законченю 12. Шветового конґресу РРЛ поцагнє, а Управни одбор предложел же би його задлуженя превжала Владислава Гарди, новинарка Рускей редакциї РНС.

 

автор:  саб