Prišli študenti z Poľska

 

РУСКИ КЕРЕСТУР - МЕДЗИНАРОДНЕ СОТРУДНЇЦТВО-ОБРАЗОВАНЄ
 

Пришли студенти з Польскей
Вчера до Руского Керестура, до тродньовей нащиви припутовали дзешецеро студенти з Польскей, з краковскей Педаґоґийней академиї - Одсеку за русинистику, вєдно зоз свою професорку – познату лемковску активистку и поетесу Олену Дуц Файфер.

Домашнї госцом з Польскей Национални совит Руснацох, ОШиҐ "Петро Кузмяк", дзе су и змесцени, та Руска матка, на чолє з предсидательом Дюром Папуґом, а спред Катедри за руски язик и литературу, домашнї госцом проф. др Михайло Фейса.

Студенти вчера присуствовали годзини руского язика, хтору керестурским школяром тримала професорка Каролина Папуґова, а нащивели и вецей керестурски институциї, орґанизациї и установи.
 

У Месней заєднїци их приял секретар Йоаким Надь и упознал з Керестуром и його жителями, та з привредним животом валала.

Госци вчера нащивели и просториї Рускей матки, дзе им предсидатель Дюра Папуґа представел 20 рочну роботу тей орґанизациї.

У будинку "Замок" польски студенти нащивели музей, як и просториї Националного совиту Руснацох, дзе их приял предсидатель Славко Орос, котри их накратко упознал з историю Руснацох на тих просторох, як и з роботу нашого Националного совиту.
 

Вечар студенти з Кракова, под час Служби Божей, нащивели Катедралну церкву св. Оца Миколая, же би после Служби нащивели Дом култури, дзе им домашнї бул о. д. директора Владимир Малацко, а у РНТ "Дядя" их привитал директор Владимир Надь Ачим.

Студенти з Польскей вчера вечар у Велькей сали Дома култури провадзели солистични концерт Сашу Палєнкаша, а спрам програми їх пребуваня, нєшка нащивя Руснацох у Горватскей - у Вуковаре и Петровцох.

Як плановане, на ютре, 16. априла, остатнього дня пребуваня у Войводини, студенти з Польскей одпутую до Нового Саду, дзе нащивя редакциї руских медийох, як и Катедру за руски язик и литературу.
 

(конєц) маф