Prohološiňa učastnykiv

                                                                                                                    
ПРОГОЛОШІНЯ УЧАСТНИКІВ       
СВІТОВА РАДА РУСИНІВ, РУСНАКІВ, ЛЕМКІВ
                                                            
Участникы Інтерреґіоналного выступу
на  гору Кременець выдавають слїдуюче проголошіня:

Карпатьсы Русины єден нероздїлный народ! То потверджує і тогорочне 4. Інтерреґоналне стрітнутя на горі Кременець, але і многопочетны окремы акції вшыткых Русинів орґанізованы в рамках Світового конґресу Русинів, Руснаків і Лемків. Днес Русины урядово прызнаты і вытворяють свої права у областях освіты, културы, інформованя і урядового хаснованя русиньского языка у Польші, Словеньску, Чеську,  Мадярску, Румуньску, Сербії і Хорватьску.

Така можливость і потреба установена і на Пдкарпатю в Закарпатьскій штатній області на Україні од 3. юла 2012 року схваленым Законом о штатнім і реґіоналных або меншыновых языкох, котрый прияла Верховна рада Україны. Тота історічна подія, котра ся стала 3. юла 2012 року із приятьом Закона о штатнім і реґіоналных або меншыновых языкох на Україні доказує неостановляючій процес признаваня історичного права Русинів, як єдного нероздїлимого народа а є першым демократичным кроком до цілкового узнаня Русинів на Україні.

І того року зме у векшыні середньо європейскых країн, у котрых  жыють Русины, на славностный спосіб ославили День Русинів, а на Підкарпатю так зробиме в октобрі того року, коли у Мукачеві сполочні зорґанізуєме Міджінародный день русиньской културы і установиме орґанізацію Асоціяція русиньскых портретовых малярів.

Наслідуючій 12. Світовый конґрес Русинів, Руснаків і Лемків зреалізуєме в юні  2013 року у Мукачеві і Сваляві на Підкарпатю. Карпатьскых  Русинів вецей нихто ніґда нероздїлить, неповадить, бо то єден народ нероздїлный!

Нова Седлиця – Кременець 14. юла 2012
Участникы Інтерреґіоналного выступу на  Кременець, члены СРР
і Конґресной комісії СКР.