PROPOZICIJA SVOTOVOJ RADY RUSYŇIV

ПРОПОЗІЦІЯ СВІТОВОЙ РАДЫ РУСИНІВ до сітуації Русинів Підкарпатя на Україні
 
Світова рада Русинів собі усвідомлює, же сучасный крітічный час на Україні вымагать од Русинів Підкарпатя велику терпезливость вытримати у своїх вымогах од Верьховной рады Україны, Влады Україны і другых компетентных державных орґанів країны за їх признаня як окремого народа і повноправной народностной меншыны на Україні.

Думаючі на досягнутя того основного ціля треба, жебы Русины Підкарпатя поступали вєдно із Світовов радов Русинів в розпочатых актівностях вызнаня їх ідентічности на Україні - вытворіня условій на вжываня і розвиток материньского языка і културы Русинів так, як дотеперь зробили компетентны орґаны країн Польска, Чех, Словеньска, Мадярьска, Румунії, Сербії і Хорватії, просто вшыткых держав Европы, де в сучаснім часі жыють Русины (Руснаци / Лемкы). Даны права выпливають із Закона о основах державной языковой політкы Україны (No. 5029-VI) ухвалены Верьховнов Радов Україны (3. 7. 2012), котры підписав презідент Україны Віктор Янукович (8. 7. 2012), як і з Европской харты о реґіоналных або меншыновых языках, яку підписала і Україна.

Тішыть нас, же од запроваджіня того Закона на Україні, окрем слободного высвітльованя прав Русинів перед очекованым зрахованьом жытелів, было зазначене зліпшіня условій, як наприклад, право на освіту в русиньскім материньскім языку, право на шыріня власной културы, інформацій і право на урядне хоснованя свого языка словом і писмом.
 
Світова рада Русинів закликує вшыткых Русинів Підкарпатя на Україні, жебы свої актівности реалізовали діпломатічным способом, взаємным порозуміньом, з толеранційов і людьскым приступом. Світова рада Русинів буде своїм діятельством напомічна при наповнюваню жаданого ціля – вызнаня прав про підкарпатьскых Русинів на Україні.

В Рускім Керестурі, 10. фебруара (02.) 2014.
 
Дюра Папуґа, председа
Світовой рады Русинів (Руснаків/ Лемків)