Reakcie na iniciativu "Ukrajina naša domovina"

Реаґованє на инициятиву за припознаванє України за матичну жем Руснацох

РУСКИ КЕРЕСТУР - Зоз заєднїцкей схадзки Управного одбору Рускей матки и Форума младих Рускей матки, котра отримана 22. септембра у Руским Керестуре, тоти два орґанизациї ше оглашели зоз окремним реаґованьом, под назву "Першокласна провокация", котре приношиме у цалосци.

"УО Рускей матки и Форума младих РМ, на заєднїцкей схадзки отриманей пияток, 22. септембра у Руским Керестуре, розпатрали причини и окреме чкодлїви пошлїдки инициятиви за припознаванє України за матичну жем Руснацох, хтора порушана 12. септембра у Коцуре, на заєднїцкей схадзки представнїкох Совитох месних заєднїцох Коцура и Руского Керестура.

Управни одбор и Форум младих Рускей матки утвердзели потребу реаґованя, хторе будзе доручене медийом на руским язику з цильом його обявйованя."

"Основна оцена же порушованє инициятиви за припознаванє України за матичну жем Руснацох представя першокласну провокацию и озбильну политичну глупосц инициятора и спрам Руснацох и спрам держави України и може лєм начкодзиц терашнїм, дипломатично поведзено, толерантим и розумним медзисобним одношеньом”. "Бо, знаю и Руснаци, а зна и Україна же одкаль Руснаци походза, знаю же бешеда бачванско-сримских Руснацох у основи земплинско-шаришска, як и народни шпиванки и обичаї; же найвекша часц Руснацох приселєна зоз Земплину и Шаришу, а менша часц зоз Лемковини и Подкарпат'я”.

"Знаю и єдни и други же нєшка Руснаци/Русини/Лемки автохтоно жию у седем штредньоевропских жемох: Польскей, Ческей, Словацкей, Мадярскей, Румуниї, Горватскей и Сербиї, дзе су и урядово припознати як национални заєднїци и дзе хасную шицки права за очуванє власного идентитета.

Жию и на Подкарпат'ю у України, дзе им ше и надалєй нє дошлєбодзує демократичне право вияшнїц ше як сцу, алє су з боку и моцу держави преглашени за “субетнос” українского народу. Прето шицки тоти осем штредньоевропски жеми творя ґрупу ЖЕМОХ МАТИЧНЕЙ НАЦИЇ РУСНАЦОХ”.

"А, матичну жем ше нє вибера, алє здобува зоз родзеньом, активносцу и роботу, длугорочним тирваньом и животом. Прето за бачванско-сримских Руснацох матична жем тераз Сербия, братом за Дунайом Горватска, Руснаком и Русином у Земплину и Шаришу Словацка, Лемком Польска... И нє мож з єдну фалшиву декларацию "проукраїнски", або "антиукраїнски" ориєнтованих Руснацох пременїц тоту ИСТОРИЙНУ И ФАКТИЧНУ ПРАВДУ". "Провокация и цифрована спреводзка и у “твореню” економских ефектох на хасен приватних привредних субєктох “Зарно”, “Юарбис” и других, после чого би “прави” хасен мали и шицки други Руснаци, по прикладу значней финансийней помоци подприємству “Слован” зоз Селенчи з уровня Републики Словацкей, матичней жеми Словацох у терашнєй Сербиї.”

"Нє мож ту и нє треба як арґумент хасновац финансийну помоц України Новинско-видавательному подприємству “Руске слово” зоз Нового Саду зоз 2001. року у новинским паперу и мазуту, хтора, по правдзе поведзено, требала и мушела буц наменєна припаднїком українскей националней заєднїци у нашей жеми; за чим вони мали вельки потреби, а нє за задовольовованє потребох дзепоєдних розгоруцених главох на целох Руснацох хтори то лєм теди кед маю власного хасну”.

"Озбильну критику и спозоренє Управни одбор и Форум младежи Рускей матки упут'юю и медийом на руским язику, медзи хторима у першим шоре “Рускому слову”, “Рутен-пресу” и руским редакцийом Радио Нового Саду и Телевизиї Нови Сад, хтори тей першокласней провокациї и озбильней политичней глупосци, свидомо чи нє, пошвецели превельо и простору и уваги, нє роздумуюци вообще о тим яки то може мац озбильни национално-политични пошлїдки, нє лєм медзи Руснацами, алє и вельо, вельо ширше” - стої у реаґованю УП и Форума младих РМ.

Рутенпрес