Reakcyja ku 11. Svitovomu kongresu Rusyniv...

По прочітані інформацій на інтернеті www.rusyn.sk_ о 11. Світовім Конґресі Русинів, єм ся розгоднув выядрити власный назор  на 11. Світовый конґрес Русинів - з того Конґресу єм скламаный бо: 
На русинскім світовім небі владне Недостаток ведомості  о пріорітах в ідентифікації русинской народності і о главных проблемах Русинів у світовій політиці Конґресам Русинів хыбує ціляведомость, як соль до їдла.
 

Я од 6-го Конґресу в Прагі не был на ниякім Конґресі Русинів.  Зато мі было чудне же перед Конґресом  мі пару  сталых  учасників СКР повідало, же уж немат цену ходити на СКР бо узнаня русинской народності на  Україні уж є нереалне  а же далшых 100 років будеме дале лем Українцями. Прошу ся:  Чом настала така носталґія  і недовера русинскых конґресменів ґу СРР?  Де є найвеце Русинів? На Україні. Ніч інше не є про нас таке важне, як є узнаня русинской народності Українсков владов і українскім парламентом. А рішіня того проблему бы мало быти централнов точков каждого, ай того Конґресу. Але не было.  А ту уж маме за собом 11. Світовый Конґрес Русинів а Русины на Україні іші фурт не мают признаны  свої народностны права а в нашім проґрамі  Конґресу ані небыл  бод жебы зме тот проблем рішыли.  Як є то можне?
 

Тот Конґрес справні  мал быти на Україні в Києві за участі українскых медій і українскых політиків а не в Мадярску на даякім словенскім селі, жебы нас там нихто не нашол. То є выследок недоброй  роботы і несправного думаня членів СРР.  Без помочі світовой платформы, Русинів на Україні за коротко не буде. Без нашой помочі ся Русины своїх прав на Україні николи не добют. Русины з Україны намісто зауйму о признаня свойой народності на Україні, нам на 11. Конґресі   презентували словны утокы на другы особы, на вызнамны особності русинского руху, лем про свої особны причіны, предвели нам свої особны споры меджі собом на Україні. Делеґаты з Україны нам  доказали, же по психічній странкі оні самі не сут приправены і не сут схопны ити на світову меджінародну діпломацію заміряну на узнаня русинской народності на Україні. Русины на Україні жыют під великым психічным стресом і у великій економічній худобі.  Зато сут так легко выпровокователны і выбушны. Хочут на себе упозорнити, же їм треба помочі.   
 
11. світовый конґрес Русинів  не мал ниякой причіны діскрімінувати єдну скупину Русинів  а упредностнювати другу скупину Русинів, бо демокрація є лем втоди, коли каждый має право бити учасником їднаня о своїм жывоті.  До шпекулативной дискрімінації і до діліня Русинів на політичніх і неполітичніх, на 11. Конґресі  дошло непрятём русинів Росії за члена Конґресу, то ся назвало: Prodovžiňa kandidatnoj doby na dva roky pro organizaciu Rusinske zemľačestvo „Karpatska Rus“. Тото узнесіня є  лем неоподстатнене   порушіня двойстранной догоды о вступі до Конґресу Русинів меджі СРР а здружінём Карпатска РУС.  За другу діскрімінацію людей Конґресом поважую    узнесіня  -   Schvaľuje vylučiňa Zakarpatskoho oblastnoho blahodijnoho fondu Rusinska škola - z Ukrajiny iz  Svitovoho kongresu Rusyniv za aktyvity nezhodžujučimi sja zo Štatutom SRR.  То є шпекулативне і ничім непідложене узнесіня заміряне на звыгодніня камаратів членів СРР. Хто не камарат з членами СРР, тот не мат шанцу на жывот. Так ся просаджує  діскрімінація людей і клієнтелізмус до праксі в розгоднутях чі узнесінях СКР. То небыло о демокрації, але о владнуті малой скупинкы людей над осудами многых людей.
 
На Конґресі  ся подавала урядна справа председу Світовой рады Русинів і справы членів СРР зо штатів.  В урядній справі ся  перше повіст, што зме хотіли досягнути, чом зме то хотіли досягнути,  потім ся повіст як зме то досягували а наконец повіме чі зме досягли тото, што зме хотіли досягнути або недосягли і чом  і подаме навргы на рішіня недостатків. Так мат вызерати урядна справа. Дакотры прочітаны справы  были лем сухопарны зознамы выконаных активіт, котры ніч нам не высвітлили  і ніч нерішали. Даколи то в чітаній справі вызерало так, же орґанізатор ані сам не знат чом дану акцію робит. Прочітаны Справы указали, же Конґресу Русинів хыбує ціляведомость, як соль до їдла.
 
Дале ся рішыли вшелиякы комісії і выборы а цілком ся забыло на рішіня главного посланя СКР якым є рішіня або гледаня способу як досягнути, жебы нас Україна узнала за Русинів. О рішіня узнаня Русинів владов чі парламентом Україны ся там не старали ани самі  делеґати з Україны, не спомянув тот проблем ані єден член СРР, ані председа Дура Папуґа окрім того же были на Україні, але не повіл чого там ишли і што ся їм подарило вырішыти,  ані заступца Україны в СРР не проявил зауєм о рішіня проблему узнаня русинской народності на Україні. То было про мене найвекше скламаня. Ідеоліґія узнаня русинской ідентіты на світовім форі ся цалком стратила. Упадок зауйму о народну ідеолоґію є некламным знаком упадку змыслу народного руху і страты зауйму в СРР о досягнутя ціля русинского народного руху. До упадку світового русинского народного руху дошло винов недостаточных ведомості о тім, як ся має народ захранювати а може і винов недостатку зауйму о русинство  зо страны функціонарів СРР.  Зато виджу же у СКР в сучасності переважают зауймы о концерты і акції різного другу  над вшеобецныма зауймами о гледаня способу на досягнутя узнаня русинского народа, як єдного целку, с котрого векшына жыє на Україні. Шыткы членове СРР, окрем Америчанів, ся успокоїли с тым, што уж досягли – штатну підпору на різны акції. С пінязмі ся шыткы успокоїли і спокойно ідеово заспали. Треба до чела СКР поставити таке думаня, яке собі выжадує сучасна ситуація русинского народа.  То повіл ай Джон Ріґеті.  Справні одгаднул сучасну політичну ситуацію в якій ся находиме, требы ся пробудити зо спанку бо жывот є зміна. Як ся не пробудиме, як народ, пропадеме. Без Україны Русины не пережыют асімілацію у своїх штатах.  То треба знати і мати на памяти. Але Конґрес богужаль не похопил, што то власні повіл Джон Ріґеті. 
 
Также, як хочеме досягнути покрок у  нашых цілях,  треба досягнути  зміну в штилі роботы СРР  і зміну в способі думаня СРР, бо тот Конґрес застаґнувал винoв неадекватного способу думаня зо страны членів СРР і преекспонованого зауйму Конґресу о забаву народа. Зато тот Конґрес не покрочіл в області узнаня русинской народності на Україні ані о крок до переду. Або треба гледати чі вытворити іншу світову русинску платформу, де бы ся уплатнили ай русинскы мозґы і ведомості? Што є про русинску народность ужыточніше?   
 
Ян Калиняк, Свидник