Rozhovor (2) z Fedorom Vicom, z nahody joho jubileu...

Філм Осадне, вельколепа презентація Русиньства... вы в єдный з головных ролі. Як по часі позерате на тот філм, на атмосферу з премєры  в різных реґійонах Словеньска?
Кідь ня режісер Марко Шкоп ославив іщі з проєктом Іншы світи, так єм ішов до того бо ня заінтересовав тот проєкт. Потім кідь ня ословив, жебым ішов грати до філму Осадне, так єм то прияв зато, же єм  му вірив і охабыв єм ся ним вести. Марко є ужасный амбіціозный чоловік, котрый мать велике чутя про наш регійон. Повим правду, же кідь єм по наточіню  видив тот філм, так ся мі барз нелюбив. Но потім єм быв преквапленый кідь єм го видів уж комплетні приготовленый на премєру. Документ є властні політічного характеру, но притім зробив перфектну презентацію Русинам, што не было поводні цілено. Кідь собі тепер подумам на премєры в різных регійонах, так повим же єм быв преквапленый з участи людей, з їх інересом... Ведь вельо раз по премєрі люде конштатовали, то уж є конець? Но уведу конкретно дві премєры на двох різных містах котры мам дотепер в памяті. Братіслава была досправды ексцелентна, філм ся промітав в двох кіносалах нараз, котре были заповнены до посліднього місця людмі...А потім контраст - премєра в Осаднім... Всяде вельо авт, ціле село, як і навколитый регійон жыло тім філмом і люде ся не могли дочекати на премєру. Но мушу повисти єдну гуморну пригоду а то, же люде до Осадного перед премєров приходили лем 10 мінут перед премєров...Нерозумів єм чом! Тепер уж знам, бо ся бояли, же ся недожыють премєры, бо каждый ославовав а палінкы там было веце як воды...
 

Кідь уж сьте спомянули пиятыку в Осаднім так мі не дасть повісти, же по  філмі Іншы Світи была дость велика крітіка на тото, же сьте М. Чабалові налівав на гроб пиво. Як ся позерате на  тото конштатованя ?
Не буду то коментовати...Но знам, же тім єм М. Чабалу істо  неуразів. Подобна  была реакція і на Мілку Зімкову, родачку з Окружного, кідь грала во філмі Pásla kone na betóne...Люде ся скаржыли, же зосмішнила выходнярів...Притім то быв перфектный о реаліті жывота ту.  Нараз каждый одсуджує пиятику а притім по таймі пиє. Ведь є то обычайне, же ся піє... Гварить ся, же і  Русы  выграли 2. Світову войну а потім ю пропили...(усмів).
 

На што сьте найвеце гордый?
Думам собі, же чоловік бы не мав быти на нич гордый, бо є то подля мене глупость.  То скoрше бы мав быти спокійный сам зо собов... А я єм спокійный і тогды кідь свому  сынови добрі приграю на фотбалі а він дасть  ґол з котрого мать потім радость... 
 

Што собі найвеце желате у своїм жывоті?
Желам собі, же кідь єм ся уж раз народив так  хочу жыти аж до смерти...
 
Дорогый Федоре, по твоїх трефных высловах сама незнам што тобі пожелаты на конець!
Kідь то буде  важне, так попсую цілу статю...
Кідь то буде гуморне, так ся тот мій гумор никда не вырівнать тому  твому...
Зато,  за  нас вшыткых Русинів -  Русиньску оброду на Словеньску, Містну  організацю РОС в Пряшові,  редакцію Інфо Русин і www.rusyn.sk з нагоды твого жывотного юбілею  высловлюю велике              
Д Я К У Є М Е ,  Ж Е   Є С Т Ь ...
 
Сілвія Лисінова - інфoРУСИН  ч. 21