Rozpatrani Protokol o sotrudňictve z Rusnacami u Serbiji

Розпатрани Протокол о сотруднїцтве з Руснацами у Сербиї

Члени Координациї рускей националней меншини Републики Горватскей (РГ)
У просторийох Ради рускей националней меншини Городу Вуковар, всоботу, 23. фебруара отримана схадзка Координациї рускей националней меншини Републики Горватскей (РГ). Розпатрани питаня од значносци за континуовану роботу Координациї, а на схадзки, крем Представнїка рускей националней меншини Городу Заґребу, котри пре нєвигодну хвилю нє могол допутовац, присуствовали шицки други члени Координациї.
 
Перше розпатрани предложени Протокол о сотруднїцтве з Националним Совитом (НС) Руснацох у Републики Сербиї, хтори би мал буц подписани медзи Координацию и НС, пре розвиванє сотруднїцтва и унапредзованє розвою рускей националней меншини, та очуванє нашого идентитету у обидвох державох. Предсидателє радох, як и представнїца рускей националней меншини Осиєцко-бараньскей жупаниї на текст Протоколу дали одредзени зауваги и дополнєня, та предложени Протокол будзе послати до НС Руснацох Сербиї. После його розпатраня и прилапйованя на НС Руснацох, очекує ше же у марцу будзе и подписаани.
 
Надалєй розпатране предкладанє о снованю Координациї рускей националней меншини по вертикалним уровню. Спрам предписаньох Министерства Управи РГ, до тей Координациї уходза предсидателє радох на уровню жупанийох и представнїки з уровню жупанийох. Тота Координация ма векшу политичну значносц як Координация хтора реґистрована як здруженє.
 
Циль снованя Координациї рускей националней меншини по вертикалним уровню очуванє и унапредзованє идентитету рускей националней меншини у цалей Републики Горватскей.
 
На Координациї бешедоване и о наступних манифестацийох, насампредз о означованю Дня Руснацох у РГ, з нагоди хторого програма будзе отримана 25. мая у Вуковаре, та о Рутенияди, традицийним змаганю школярох у старих руских бавискох. За тераз нє одредзени датум отримованя Рутенияди, алє догварене же будзе на концу, лєбо на початку школского рока.

автор:  аба