Rozpredzeľeni horodski peňež za kulturu, sredstva i Rusnacom

Розподзелєни городски пенєж за културу, средства и Руснацом
РКЦ од Городу опредзелєни 300 тисячи динари
Окремна комисия Городу Нови Сад за розподзельованє пенєжу за обласц култури на основи Явного конкурсу, того року прилапела 108 проєкти и за нїх вєдно розподзелєла 127 милиони динари з буджету Городу.
 
На Конкурс конкуровали и нашо дружтва и орґанизациї, та медзи нїма найвецей средства - 300 тисячи динари опредзелєни Рускому културному центру за осем програмни активносци, медзи нїма и за „Веселинку", дзецинску и представу за старших, як и за наступи РКЦ на наших фестивалох.
 
Матка-Дружтво Руснацох Нового Саду-Войводини достанє 100 тисячи динари за орґанизованє 11. Фестивалу малих сценских формох „Дюра Папгаргаї". Дружтво за руски язик, литературу и културу 50 тисячи за отримованє 7. Поетских нїткох Меланиї Павлович, а Союз Руснацох и Українцох тиж 50 тисячи за одход на Лемковску ватру у Польскей.
 
Средства од Городу достанє и НВУ „Руске слово" - 100 тисячи динари за орґанизованє трибини „Улога литератури у дружтве".
 
Найвецей средства опредзелєни за найвекши фестивали у Новим Садзе, односно Войводини - Тамбурка фест, Еґзит, Змайово дзецински бависка и Номус. За Тамбурка фест, хтори того року будзе 28. и 29. юния, наменєни 17 и пол милиони динари, Еґзит достал 20 милиони, Новосадски музични шветочносци достали 13 и пол, а Змайово дзецински бависка 10 и пол милиони динари.
 
Як тих дньох сообщела Комисия, того року було барз вельке интересованє за конкурс у обласци култури, бо придати аж 254 проєкти, чийо финансийни вимоги були шейсц раз векши од предвидзеного буджету Городу за тоту обласц.

автор:  саб