Rusínska menšina má za sebou úspešný a na udalostí bohatý rok

Andrij Manajlo,
predseda Rusínskej celoštátnej menšinovej samosprávy v Maďarsku

Честовані русины !
Обертавучися на ми-нувші місяці рока, русинська община под руководством Вседержавного Русинського Меншинового Са-моуправленiя завершила успішный, богатый на собы-тія и нові начинанія рук. Сись рук мож назвати роком обновленя и завто, ош у нашуй общині вызріває и скомпактовуєся состоящее из булышости депутатув муцноє ядро, котроє цілеустремленно и увіренно двигає далше діло русинства, котроє способно подпоровати и выстояти коло настоящих цінностей, вытиснувши на задній план личні цілі, амбіціи.

Рук рахую успішным и завто, бо мы не лем продовжили наші традиціонні міроприятія, айбо організовали сьме и нові. Из традиціонных треба отмітити прекрасно проведені Дні памняти Антонiя Годинки, Національный День Русина и Сято Малоі Богородиці из епископсъков Божественное Літургійов и кошотолованям русинськых страв (котроє організовали роботящі русинські жоны и котроє мало такый великый успіх и было такым разнообразным и оригінальным, ош любили бысьме выдати рецептурну книгу). Из наших новых програм майцінньши были: подписаня Договора из чином св. Василія по поводу построєнія русинськоi деревляноі церкви у Маріаповчи, у сятому місті паломничества, што у повнуй мірі поддержує и новый епископ, Его Преосвященство о. Фюлеп Кочиш, попри сьому также дальнійша організація межинародных русинських пленерув у Пiлішсенткерeсті и Мікогазі. Открытi Дні пленера завершалися выставками художественных робот, часть из котрых розширила художественное собраніє ВРМС. У нашому газдовані тоже сталися обновленя.

Сього року науперше, дякувучи нашому отвітственному, направленому на розвитіє общины планованю, мы виділили из бюджета ВРМС окремий ліміт у розмірови 4.933.000 Фт на подпорованя програм РМС на містах по Мадярщині. Уєдно из сим, оприділили сьме стипендіи діла русинських штудентув из ціллю подпорованя їх ошколовання. Далше продовжали сьме подпоровання цінных, высокого качества выдань и интересных програм, як приміром, новинки „Русинськый Світ" и вседержавных міроприятій.

Сього рока зачалисьме свою Интернетну страницю (www.rusyn.hu), котра уже типирь (при наших печатных выданях), ищи булше пропагує нашу културу и углубляє ідентитет у світі. Мы надіємеся у будущому, ош Интернетна страниця буде мати булшу роль у комунікачнуй медіи. Великым результатом мож раховати и організацію ВРМС и СРМС робочоі групы по кодифікаціи русинського языка.

Важным рахуву выділити активну и содержательну роботу меншиновых самоуправленій на містах: регіонального РМС Боршод-Абауй-Земплиня, РМС Гейовкерестура, РМС Ніредьгазьі, РМС Комловшки, РМС Ваца, РМС Ердевгорваті, РМС Мішколца, РМС Мучоня, РМС Нергешуйфолу, РМС Пейча, РМС Кішвардьі, РМС Маріаповча, РМС Егера, РМС Шайовпетрі, РМС Шайовлада, РМС Осоеда, РМС Гёдёллё и другых. Они осуществили много програм, даякі из котрых подпоровало ВРМС. Заслужує признанія и діятельность РМС районув Будапешта: РМС XI р-на, РМС III р-на, РМС VI, V, XIII, VIII, IX, XXI районує...

Дуже содержательнов и активное є робота СРМС, котроє провело много самостоятельных міроприятій и уєдно из ВРМС. Сесі міроприятія были репрезентативні и памнятні. Достиглисьме файных результатув и из нашыми выданями. Осущєствлені нами планы, програмы, єжемісячні міроприятія были отображені и у дуставшому уже межинародноє признаніє „ Русинському Світі" и на страницях нашого сайта.

Рахуву необходимым отмітити, ош мы не достигли бы таких результатув без добро-совістноі роботы активных членув русинськоі общины!

2008 рук быв первым роком, у котрому робота ВРМС по совсім новым, строгым и сложным законам мала проводитися, як робота бюджетноі організацій. По предписанію закона мы создали Уряд, робота котрого потребовала професіональних сотрудникув. Eстественно, ощ ефективна робоча група не може організоватися из первого раза, и теперь иде ищи процес становленія, айбо я вірую у вто, ош у 2009 році нашуй роботі будуть помагати квалифіковані, добре подготовлені професіональї. Из точки зренія фінансованя мусиме приготовитися на тяжкый рук. Правительство у 2009 році не планує поддержовати роботу Уряда фінансово (сього рока поддержовало суммов 8, 5 млн. фор.). Такым образом, содержати його треба из собственного, доста скромного бюджета. У утішеніє можу уповісти, ош теперь первый раз удалося достигнути (не позиравучи на тяжкое економічноє положеня державы) увеличенія подпорованя ВРМС по посліднуй информаціи на 1,2 млн. форінтув. Кромі того, діла продовженя програми художественного пленера (сим призна-вучи його цінность) держава увеличила бюджет музеального собранія ВРМС на 1,5 млн. фор.

Честовані братя!
Я хотів бы каждого мотивовати и просити продовжати активну роботу во имня русинства. У мені, як у первого лиця ВРМС, вы усе найдете партнера и подпоровача. Я увіреный у тому, кидь мы обєдинимеся и достигнеме результатув у осуществленіи цінных програм, як напримір, построєніє дерєвляноі церквы у Маріяповчі, на сятуй землі паломникув, наша община укрепиться наухтема. Бо создаме таку драгоцінность, котра обстанеся діла многых генерацій духовнов цінностью, котра буде служити процвітанію нашого народа. Мы закладеме муцный фундамент діла усиленія и углубленія нашої греко-католи-чеськоі вірьі и идентитета. Годни будеме выголо-сити из гордостью и радостью, ош заданіє, котроє узялисьме на себе, воплотилисьме!

Желаву, обы 2009-й рук став роком обьєдиненія и ренесанса русинства!