Rusínsky podujaťa v Staryj Ľubovňi

RUSINY VO FILMOVYM DOKUMENŤI. Takyj byv nazov podujaťa, ktore sja odbylo 17. oktobra 2008 v hoteľu Komeko v Staryj Ľubovňi a ktoroho holovnym organizatorom bylo Združiňa inteligenciji Rusiňiv Slovenska, kolektivnyj člen Rusinskoj obrody na Slovensku.

Jak v uvoďi informovala moderatorka podujaťa, šarmantna a všytkym dobri znama spivačka PUĽS-u Marianna Železná z Chmeľovoj, projekt RUSINY VO FILMOVYM DOKUMENŤI sja už uspišňi realizovav v Bratislavi, v Humennim, v Sniňi i v Barďijovi a Staru Ľubovňu navščiviv po peršyj raz. V hoteľu Komeko sja zyšli Rusiny z ciloho okresu a dast sja povisti, že premitacja sala byla takmer cila zapovnena. Samozrejmi zasluhu na hojnyj učasti majut i otcove duchovny, ktory v cerkvach (ci už v Kamjunci, abo v Staryj Ľubovňi) vyholosili, ze taka akcija sja uskutočnit. Samotny filmy, ale i rozpravjaňa Poľskoho režisera Krzysztofa Krzyzanowskoho byli interesantny, aj keď možna v daktorych pasažach dosť naročny na pochopiňa. V prestavki medži filmami bylo pripravene občerstviňa a v korotkosti vystupiv i zástupca novoj rusinskoj molodežnickoj organizaciji MOLODY RUSINY Peter Štefaňák, ktoryj poinformovav pritomnych o jej aktivitach a zameroch. Atmosfera a dojmy z podujaťa byli calkom dobry a tak je predpoklad, že danyj projekt by mav v Staryj Ľubovňi uspich i po druhyj raz. Ale toto už lišme na organizatoroch.

Koho však može vecej interesuje ďivadlo jak film, aj takyj sobi mich priti na svoje, bo v neďiľu 19. 10. 2008 Stara Ľubovňa privitala herciv Teatru Alexandra Duchnoviča z Prjašova, ktory predveli hľadačam ďivaďelnu hru Christa Bojčeva - Okresnyj špytaľ.

Holovnym organizatorom podujaťa byla tento raz Rusinska obroda na Slovensku a o uvodňe slovo ohľadom Rusinskoj obrody, jej aktivit a ščitaňa ľudej v roku 2011 sja postarav Martin Karaš a poťim už začav vecej jak dvojhodinovyj maraton hereckych vykoňiv, srandy, ďivackoho smichu, aplauziv a pod. Predstaviňa bylo zakinčene velikym skandovanym aplauzom a dumam sobi, že herci i ďivaci mohli byti spokijny. Bezprostredny ohlasy byli priam fantasticky a je len otazkou času, koli Teater Alexandra Duchnoviča navšťivit okres Stara Ľubovňa zas.

-mk-