"Ruske slovo" preslavelo 65-ročňicu

"Руске слово” преславело 65-рочнїцу
 

Новинско-видавательна установа "Руске слово" вчера преславела 65-рочнїцу снованя и виходзеня новинох "Руске слово".

Як гварела потпредсидателька покраїнскей Влади и секретарка за информациї у Влади Войводини Ана Томанова Маканова, ювилей - 65 роки виходзеня руских новинох "Руске слово" значни за шицких жительох Войводини.
 

На конференциї у Влади Войводини Томанова Маканова гварела же Покраїнска Влада дава вельку увагу писаним медийом етнїчних заєднїцох, бо вони состойна часц велкей фамелиї хтора жиє у Войводини.

Спрам єй словох, политика Влади Войводини же би през субвенциї писаним медийом на язикох етнїчних заєднїцох помогла у витворйованю їх правох, а на рочним уровню, ресорни Секретарият за тоту намену видвоює 300 милиони динари.

Томанова Маканова гварела же шейс и пол децениї "Руского слова" значи же ше роби о компактней националней заєднїци, хтора ма виско розвиту свидомосц о припадносци, хтора зна вредновац информованє на мацеринским язику, о чим шведочи нє лєм порядне виходзенє тижньовнїка “Руске слово”, алє и других виданьох тей Установи.
 

Директор "Руского слова" Владимир Паланчанин гварел же основни задаток занятих у тей Установи унапредзеованє єй роботи, цо у нєшкайших условийох лєгчейше пре значну помоц держави, хтора на тот способ реализує политику спрам националних заєднїцох.

О концепциї новинох бешедовал одвичательни редактор Дюра Винаї, а на конференциї бешедовали и предсидатель Управного одору НВУ "Руске слово", народни посланїк Дюра Мученски и спред снователя, предсидатель Националного совиту Славко Орос.

Як гварене на конференциї, НВУ "Руске слово" по тераз обявело вецей як 400 наслови на руским язику, а у остатнїх штирох рокох, заняти новинаре информую руску явносц и читательох о найважнєйших дньових збуваньох и прейґ аґенциї "Рутенпрес", хтора єдинствени проєкт у швеце.
У рамикох видавательнєй дїялносци виходза часопис за литературу и културу "Шветлосц", младежски часопис "Мак" и дзецински - "Заградка".

"Руске слово” ма 30 занятих, дзе 22 з високу фахову приготовку, а попри информованя, улога тей Видавательней Установи и пестованє традициї, очуванє язика и култури рускей меншини.
 

После конференциї у Влади Войводини, преслава орґанизована у просторийох "Дневник голдинґу", на хторей присуствовали и госци з других редакцийох на меншинских язикох, визначни особи з руского явного живота, сотруднїки "Руского слова" з нашей заєднїци и заняти у тим колективе.
 

(конєц) ад