Ruski Kerestur: Otrymana 48."Červena ruža"

На вчера вечар отриманим 48 Фестивалу рускей култури "Червена ружа" у Руским Керестуре, у змаганю за найкрасши глас дует Ивана Пейович зоз Бачкей Паланки и Оксана Рамач зоз Руского Керестура освоєли кошарку червених ружох, а Марко Радишич зоз Дюрдьова чобольов.

Того року змагали ше два дзивоцки дуети и шейсц млади шпивачки як и штирме леґинє, зоз рижних наших местох, док друга часц фестивалского вечара представяла ревиялни концерт ансамблох, а тогорочних побиднїкох на других наших фестивалох.

У тей часци наступела Тамбурова орхестра КУД "Петро Кузмяк" зоз Нового Орахова, Хлопска жридлова ґрупа Дома култури зоз Керестура, дует Андрея Бучконєц и Весна Надь тиж зоз Керестура як и Дюрдьовски квартет Даниєла Мушицки, Верица Салонски, Мирослав Кониш и Михал Колєсар та Фолклорни ансамбл керестурского Дома култури.

У другей часци "Червеного пупча" наступели дзеци зоз Дюрдьова, Вербасу, Нового Саду, Руского Керестура и Коцура котри виведли дзевец шпивацки, орхестрални и танєчни точки.

На концу ше у двацецминутним блоку публики представел госцуюци Дзецински музично-фолклорни ансамл "Капушанчан" зоз Капушанох у Словацкей републики, котри мал барз квалитетни и атрактивни наступ.

Руководителє тогорочного 41. "Червеного пупча" були Михайло Зазуляк, котри и автор конферанси, Мирослав Пап и Юлиян Рамач Чамо, а водителє Адрияна Надь и Андрей Орос, док сценоґрафию обдумала Биляна Роман. Шпивачох провадзел "Шкорванчок", Дзецинска вокална ґрупа Дома култури зоз Руского Керестура а аранжмани и матрици за нови композициї зробели Мирослав Пап и Юлиян Рамач Чамо.

Главни спонзор тогорочного Фестивала "Червена ружа" була Металс банка АД Нови Сад, а на рижни способи го потримало Министерство култури Републики Сербиї, Покраїнски секретарият за културу и Секретарият за предписаня, управу и национални меншини АП Войводини, як и општина Кула, Национални совит рускей националней заєднїци, ОШ и Ґ "Петро Кузмяк" и Месна заєднїца Руски Керестур.

(конєц) маф