Rusnaci dostali svojo urjadovo nacionalne symboly

ГОРВАТСКА - НАЦИОНАЛНИ МЕНШИНИ

Застава Руснацох у Горватскей будзе трофарбова: червена, била и белава, зоз русинским гербом-медведзом у штредку, алє з малима допольнєнями зоз застави Републики Горватскей.

Шветочна шпиванка Руснацох Горватскей будзе текстуално модификована шпиванка "Браца Русини”, дзе место стиха "На бачванскей ровнї...”, як то у ориґиналу, будзе стац "На панонскей ровнї...". Националне швето Руснацох у Горватскей ше будзе означовац 25. мая, и вязане є за снованє грекокатолїцкей парохиї у Петровцох.

Заключенє о хаснованю тих националних символох Руснацох у Горватскей принєшени на Совиту за национални меншини Републики Горватскей штредком септембра, з чим предложени символи постали урядово.

Предлог о националних символох до того найвисшого державного цела за меншини у Горватскей, формуловала Координация радох рускей националней меншини, а на основи широкей явней розправи медзи Руснацами у Горватскей, котра окончена ище вєшенї 2008. року.

Уж концом того рока, на Координациї радох рускей националней меншини почню прирхтованя за орґанизованє означованя першого Националного швета Руснацох у Горватскей, а за тераз познате же Централна шветочносц з тей нагоди найвироятнейше будзе отримана у Вуковаре.

(конєц) дюлї/зам