Rusnaci - kandidati za poslaňikoch

 
Руснаци - кандидати за посланїкох
На нєдзелю, 6. мая, у Сербиї буду отримани виберанки за Републичну Скупштину, парламенти локалних самоуправох и за предсидателя Сербиї. Гласаче у Войводини буду виберац и посланїкох до Скупштини Войводини.

На вецей виберанкових лїстинох за вибор посланїкох до Скупштини Сербиї и Скупштини АП Войводини кандидати и Руснаци з наших местох. 

На виберанковей лїстини за парламентарни виберанки под шорним числом 1 - Вибор за лєпши живот-Борис Тадич двойо Руснаци кандидати за републичних посланїкох - Олена Папуґа, новинарка и др Дюра Мученски, лїкар-интерниста, обидвойо з Руского Керестура и дотерашнї народни посланїки.

За посланїкох до Скупштини АП Войводини по векшинскей системи, кандидати штверо Руснаци.

У општини Кула то, под шорним числом 1, Александар Арваї з Червинки, поднїматель, спред Зєдинєних реґионох Сербиї и под шорним числом 9 Олена Папуґа, новинарка з Руского Керестура, спред Лиґи социялдемократох Войводини-Ненад Чанак.

З општини Вербас, под шорним числом 9, кандидат за покраїнского посланїка по векшинскей системи Славомир Русковски, поднїматель з Коцура, спред коалициї Войводянски преобрат-Либералнодемократска партия-Сербски рух обнови. 

У општини Шид, под шорним числом 9, по векшинскей системи кандидат за покраїнского посланїка Звонко Гнатко, дипл. инж. польопривреди зоз Шиду, спред Лиґи социялдемократох Войводини-Ненад Чанак.

Медзи 60 кандидатами за одборнїкох до Скупштийни Войводини по пропорцийней системи на лїстини под шорним числом 1 - Вибор за лєпшу Войводину-Боян Пайтич (на чолє з Демократску странку) двойо Руснаци - Славко Рац, економиста, предсидатель Националного совиту Руснацох и Леона Виславски з Дюрдьова, акушерска шестра, дотерашнї покраїнска посланїца.

По пропорцийней системи, на лїстини Сербска радикална странка-Др Воїслав Шешель, под шорним числом 4, кандидат за покраїнского посланїка Ивица Саламун, металски роботнїк з Ґосподїнцох.

У случаю же у першим кругу покраїнских виберанкох по векшинскей системи анї єден кандидат у виберанковей єдинки нє освої вецей як половку гласох, будзе отримани други круг, у хторим участвую двоме найлєпшепласовани кандидати з першого кругу.

Други круг покраїнских виберанкох по векшинскей  системи будзе 20. мая, кеди будзе отримани и други круг виберанкох за предсидателя Републики Сербиї.

(конєц) зам