Rusnaci z Mikloševcoch i Osijeku na Dňu chleba

Руснаци з Миклошевцох и Осиєку на Дню хлєба
Руснаци представели и нашо єдла з муки

ОСИЄК - Дзеци КУД "Яким Ґовля" з Миклошевцох 9. октобра участвовали на преслави з нагоди означованя Дня хлєба, хтора отримана у просторийох Здруженя "Шокецки конар" у Осиєку. У кратшей програми участвовали шпивацка ґрупа домашнїх "Шокици" и дзецинска рецитаторска ґрупа.
 
Миклошевчанє ше, як госци, представели з рускима шпиванками у виводзеню Дзивоцкей ґрупи и солистки Паули Поточки, док танєчнїки виведли два танци. На гармоники их провадзел Иван Лїкар.

После програми шицки нащивителє на вецей штандох могли коштовац национални єдла з муки, а нашо єдла - рейтеши, на квасу, череґи, ґоргелї, кифлочки и инше, пририхтали мацери миклошевских малих аматерох у КУД.
 
Попри Миклошевчанох, руски єдла виложели и члени Дружтва Руснацох з Осиєку, котри на тей преслави роками поряднє участвую. Дзекуюци закладаню їх членох, на чолє з предсидательку Дружтва Агнетку Балатинац, алє и предсидательки Союзу Русинох и Українцох РГ Дубравки Рашлянин, Руснаци з Осиєку на тей манифестациї понукли белюши, ґоргелї, капущанїки и череґи.

автор:  клї