Rusyn/Rusnak Michaik Dudaš treci u dzešecboju u Evropi!

 

Амстердам (Голандия): Руснак Михаил Дудаш треци у дзешецбою у Европи! 

 

АМСТЕРДАМ (ГОЛАНДИЯ) - Найлєпши дзешецбоєц Сербиї Михаил Дудаш 8. юлия освоєл бронзову медалю на Европским першенстве у атлетики у Амстердаму, з вєдно 8 153 бодами. То вообще перша даєдна медаля за Сербию у дзешецбою, а Михаил Дудаш Руснак з Нового Саду, чийо родичи Руснаци родом з Руского Керестура.

 

У єдней з найчежших атлетски дисциплинох, у дзешецбою, на Европским першенстве у Голандиї ше 6. и 7. юлия змагали 28 атлетичаре. Перши дзень, после 5 дисциплинох,  Михаил освоєл 4 199 боди и бул на другим месце, а ютредзень, на основи посцигнутих резултатох, преходзел з другого на треце место, хторе и затримал до конца змаганя.

 

Перше место у дзешецбою освоєл Томас ван дер Платсен з Голандиї зоз 8 218 бодами, а друге Чех Адам Хелцелет зоз 8 157 бодами. 

 

Михаилови на посцигнутим позарядовим успиху такой исти дзень повинчовали министер младежи и спорту Сербиї Ваня Удовичич и городоначалнїк Нового Саду Милош Вучевич.

 

- Щиро винчуєм Дудашови и його тиму на тим успиху! Кажда чесц! - гварел медзи иншим министер Удовичич, а городоначалнїк Вучевич у своєй винчованки наглашел городосц Новосадянох и цалей Сербиї пре Михаилов успих:

 

- Нєшка нас окреме гордих направел Михаил Дудаш, наш сограждан, котри, сиґурни сом, войдзе до историї, бо за Сербию освоєл першу дакеди освоєну медалю у дзешецбою - гварел Вучевич, наглашуюци же Город Нови Сад и надалєй будзе давац потримовку нє лєм Михаилови и атлетичаром, алє шицким спортистом.

 

зам/ртв;

фото танюґ/АП

Фотка-Дудаш