Šicki ľistini uchodza do Nacionalnoho sovitu Rusnacoch

 

Шицки лїстини уходза до Националного совиту Руснацох

РИК обявела прелиминарни резултати виберанкох за НС

 

Републична виберанкова комисия (РИК) и Републични завод за статистику обявели вчера прелиминарни резултати нєдзельових виберанкох за национални совити националних меншинох, по хторих шицки седем лїстини хтори участвовали на виберанкох за Национални совит Руснацох достаню мандати у новим зволаню Совиту.

 

По прелиминарних резултатох, достатих на основи обробених податкох зоз шицких 155 гласацких местох дзе гласали Руснаци, спомедзи 8 270 Руснацох уписаних до окремного виберацкого списку, внєдзелю на виберанкох гласали 3 317, односно 40,11 одсто з числа уписаних.

 

Найвецей гласи - 806, лєбо 24,3 одсто гласачох котри вишли на виберанки, достала лїстина "Вєдно за Руснацох-Славко Рац", хтора у новим Совиту будзе мац пейц мандати. Лїстина "Руска лиґа" Олена Папуґа достала 634 гласи, односно 19,11 одсто, и у новим Совиту будзе мац штири мандати.

 

По три мандати буду мац лїстини "За Руски Керестур-Желько Ковач", хтора достала 526 гласи, лєбо 15,86 одсто, и "Я Руснак", за хтору гласали 468 гласаче, цо 14,11 одсто.

 

Лїстина Руска инициятива,Микола Шанта достала 399 гласи, лєбо 12,03 одсто, та з тим и два мандати, а по єден мандат достали младежски лїстини - "Млади за будучносц" зоз 254 гласами, лєбо 7,66 одсто, и "Руска младеж" зоз 194 гласами, лєбо 5,85 одсто гласачох котри вишли на виберанки.

 

Прелиминарни резултати РИК мож превжац на урядовим сайту Комисиї, зоз секциї "сообщеня".

 

Вчера ище нє були обявени поєдинєчни резултати нєдзельового гласаня у векших городох, алє су ураховани до цалосних прелиминарних резултатох. Конєчни резултати виберанкох за национални совити буду обявени на штварток, 30. октобра.

 

автор:  саб