Slavko Rac predsidateľ

Славко Рац предсидатель


З оглядом же Национални совит 3. юлия бул лєм конституовани, а нє вибрани и його предсидатель, Другу схадзку Совиту зволал, и по вибор предсидателя, водзел предшедуюци Роботного предсидательства Конститутивней схадзки и член Совиту Йовґен Мудри. Практично, Друга схадзка 10. юлия була предлуженє Першей, Конститутивней схадзки.

Як и на Першей, за предсидателя Националного совиту Руснацох, а на основи предкладох вецей як трецина членства Совиту, були предложени двойо кандидати - Славко Рац, як ношитель лїстини "Вєдно за Руснацох" и Олена Папуґа, як ношителька лїстини "Руска лиґа-Олена Папуґа".
 

Члени Совиту ше вияшнєли же о виборе предсидателя буду гласац тайно. После першого тайного гласаня - предсидатель нє вибрани, понеже обидвойо кандидати достали по 9 гласи, єден лїсток бул нєважаци и анї єден кандидат нє мал потребну абсолутну векшину членох Совиту од 10 гласи.
З оглядом же то було уж на треци завод же нє вибрани предсидатель Совиту, рахуюци и два гласаня на Конститутвней схадзки, предшедуюци Йовґен Мудри предложел членом Совиту же би ше кажди вияшнєл як ришиц тот проблем, бо, практично, Национални совит нє годзен у подполносци функционовац, покля нє будзе вибрани його предсидатель.

У тей розправи, векшина членох Совиту предкладали же би ше на тей Другей схадзки вибрало предсидателя, на цо предшедуюци Йовґен Мудри предложел ище єдно тайне гласанє, зоз заувагу же, кед и воно будзе нєудатне, вец би ше приступело явному гласаню.
 

После другого тайного гласаня за предсидателя Совиту, 11 гласи достал Славко Рац и 8 гласи Олена Папуґа. Предшедуюци на схадзки констатовал же з тим - Славко Рац вибрани за предсидателя Националного совиту Руснацох, котри од тей хвильки далєй и водзел схадзку Совиту.

Мушиме буц одвичательни у роботи
После гласаня и вибору за предсидателя Националного совиту Руснацох, Славко Рац подзековал шицким на довирию котре му дате, а у краткей вияви после вибору, Рац ше огляднул и на приоритети котри пред новим составом Националного совиту.
- Насампредз, то пририхтованє предлогу Статута, Дїловнїка о роботи и їх приношенє, як и других важних документох котри нєобходни за функционованє Националного совиту, а цо по наступну схадзку прирхта за тото вибрана Роботна ґрупа.
И дотерашнї два схадзки и вибор предсидателя Совиту, указую же мушиме буц барз одвичательни у роботи. Нє будзе ту импровизованей роботи, людзе знаю роздумовац зоз свою главу и рахуєм же то да векши квалитет тому составе Совиту. Нє очекуєм же ше будземе надгласовац коло каждого векшого проблему, бо то нє заслужує анї Совит, а окреме нє наша национална заєднїца.
- Лєтнєй павзи за членох Совиту практично анї нє будзе. Хто сце, най ше одпочинє по идуцу схадзку Совиту, а вец нас очекує велька робота - прилапйованє буджетох у шицких установох и дружтвох у штредкох дзе жию Руснаци, же би ше на час конкуровало за буджет у 2011. року - гварел нововибрани предсидатель Националного совиту Руснацох Славко Рац.

Сполнєта обецунка
После гласаня о вибору за предсидателя Националного совиту Руснацох, вияву за медиї дала и Олена Папуґа, кандидатка за предсидателя Совиту:
- Мнє мило же сом у першим гласаню достала 9 гласи. Тото перше гласанє було найщирше. Думам же у другим гласаню людзе сцели претаргнуц аґонию цо ше случела у тим шицким, бо людзе, як и я, сцели же би Совит функционовал. Так же друге гласанє толкуєм як ценку побиду, бо думам же би члени Совиту гласали и иншак як можебуц роздумовали, прето же сцели ришиц тоту нєприємну ситуацию.
- Я задовольна же сом сполнєла тото цо сом и обецала - же витримам до конца, нє станєм на штред драги и нє поґажим по гласох гражданох хтори дали лїстини под числом єден.
- Будзем ше и далєй закладац, вєдно з другима, за конструктивни ришеня и роботу у Совиту, а шицки предсидателє зменлїви, як цо и людзе зменлїви, бо каждого цо нє добре роби, так и мнє - мож зменїц - гварела после гласаня кандидатка за предсидателя Националного совиту Руснацох Олена Папуґа.
 

(конєц) сим