Slováci v Srbsku oslavovali

БАЧКИ ПЕТРОВЕЦ, 8. авґуст 2009. (Рутенпрес) - З виставами, стретнуцами интелектуалцох, студентох и спортистох, вчера, 7. авґуста, у Бачким Петровцу почали тогорочни Словацки народни шветочносци, котри буду тирвац по ютре, 9. авґуст.

У рамикох Шветочносцох словацкей националней заєднїци у Сербиї под час трох дньох буду отримани концерти, представени нови кнїжки, заплановане виводзенє и єдней театралней представи, а наявене же Словацки народни шветочносци буду преглашени и за Националне швето словацкей националней заєднїци у Сербиї.

Спрам словох предсидательки Матки Словацкей у Сербиї Катарини Мелеґовей, тота манифестация - Словацки народни шветочносци - означує 90-рочнїцу свойого постояня, а праве на нєй поприношени найзначнєйши одлуки за живот Словацох на тих просторох.

Так, 1924. року Словацка євангелистична церква одвоєна од нємецкей, 1932. року оформена Матка словацка, 1949. року отворени Народни музей, под час Шветочносцох преробела друкарня на словацким язику, оформени часописи, професийни театер шицко цо словацку националну заєднїцу твори ровноправну з другима у Сербиї.

Центер Словацох у Сербиї Бачки Петровец, дзе попри других националних и културних институцийох, робя и штреднї школи по словацки, а на Факултету у Новим Садзе роби и Катедра за словацки язик и литературу.

У Сербиї тераз жиє коло 56 000 Словацох и як гварела Катарина Мелеґова, у одношеню на число жительох, маю найвекше число високошколованєй популациї у тей часци Европи, досягнути барз високи стандарди витворйованя правох националней заєднїци, за цо заслужна и держава Сербия.

Як наявене, на манифестацийох Словацких народних шветочносцох буду присуствовац и подпредсидатель Влади Словацкей републики Душан Чаплович, та министер за людски и меншински права Влади Републики Сербиї Светозар Чиплич и други високи функционере Сербиї и Войводини.

(конєц) зам