Slovac’ka vlada vŷmenovala upovnomočenoho pro menšŷnŷ

Kabinet maje v plani rušŷty menšŷnovŷj fond

Vlada Slovac’koj republikŷ na svojim zasidaňu v seredu 20-ho decembra 2023-ho roku vŷmenovala novoho upovnomočenoho pro narodnostnŷ menšŷnŷ. Tota funkcija bŷla neobsadžena od 25-ho oktobra, koly bŷv odklykanŷj Laslo Bukovskŷj.

Novŷm upovnomočenŷm vladŷ Slovac’koj republikŷ pro narodnostnŷ menšŷnŷ stav Akoš Horoň. Joho vŷmenovaňa je schvalene ku 21-mu decembru.

Slovac’ka vlada tak samo publikovala legislativnŷj plan na 2024-ŷj rik, v ramkach kotroho choče zrušŷty menšŷnovŷj fond.

Akoš Horoň
Mgr.art. Dr.Jur. Akoš Horoň (1975 r.) je rodakom iz Dunajskoj Stredŷ. Absolvovav študiji na Vŷsokij školi vŷtvarnŷch umeň v Bratislavi, i na Katolyc’kij univerziti Petra Pazmaňa – na Fakulti prava i deržavŷ, v Budapešti.

Horoň bŷv umelc’om u voľnij profesiji, pizniše bŷv i asistentom deržavnoho sekretar’a Ministestva kulturŷ Slovac’koj republikŷ ci asistentom deputata Narodnoj radŷ Slovac’koj republikŷ.

V ostatnich rokach bŷv i členom jazŷkovoj ekspertnoj grupŷ pro maďar’skŷj jazŷk na Ur’adi upovnomočenoho vladŷ SR pro narodnostnŷ menšŷnŷ. Totŷ grupŷ pro okremŷ menšŷnŷ pryhotovľujuť do jazŷkiv menšŷn perekladŷ zakoniv, medžinarodnŷch dohovoriv i dalšŷch materialiv.

Akoš Horoň je tak samo deputatom Misťskoho zastupyteľstva v Dunajskij Stredi a predsedom Komisiji Misťskoho zastupyteľstva v Dunajskij Stredi pro spravŷ chosnovaňa jazŷka narodnostnoj menšŷnŷ.

Za našŷma informacijamy maje novŷj upovnomočenŷj blyzko ku maďar’skij vladi Viktora Orbana. Za maďar’sku storonu sydiv i na zasidaňach Zmišanoj slovac’ko-maďar’skoj komisiji pro spravŷ menšŷn.

Vlada choče rušŷty menšŷnovŷj fond
Slovac’ka vlada tak samo pubkikovala Plan legislativnŷch zadač vladŷ SR na rik 2024. Na mis’ac’ jun je naplanona Propozicija zakona o Fondi na pidporu kulturŷ, kotroj gestorom maje bŷty Ministerstvo kulturŷ.

„Propozicija zakona bude peredložena na osnovi Programovoho vŷhološiňa vladŷ Slovac’koj republikŷ 2023 – 2027. Fond na pidporu kulturŷ bude davaty pidporu kulturi v slidujučich oblasťach: deržavnŷj jazŷk i slovac’ka literatura, žŷva kultura, kulturna didovyzna, i kultura narodnostnŷch menšŷn. Fond vŷnykne reorganizacijov doteperišnich verejnopravnŷch fondiv, kotra maje realizovaty s’a zlučiňom Fondu na pidporu umeňa i Fondu na pidporu kulturŷ narodnostnŷch menšŷn,“ pyše s’a v materiali.

Pryjaťom takoho zakona bŷ s’a zrušŷly dva isnujuči fondŷ, medži nyma menšŷnovŷj, a zrobyv bŷ s’a jeden novŷj. Plan legislativnŷch zadač vladŷ SR na rik 2024 je momentalno v medžirezortnim prypominkovim procesi.

Vŷnykla už hromadna prypominka
Fond na pidporu kulturŷ narodnostnŷch menšŷn vŷnyknuv u 2017-im roci, počas treťoj vladŷ Roberta Fica, koly v koaliciji mala joho partija Smer-SD i partiju Most-Híd. Peršŷ vŷzvŷ z fondu bŷly na rik 2018.

Proty rušiňa menšŷnovoho fondu už vŷnykla hromadna prypominka, kotroj organizatoramy suť Konrad Rigo, Laslo Bukovskŷj i Abel Ravas.

„Fond na pidporu kulturŷ narodnostnŷch menšŷn jednočasno je i jedynov zakonom zr’adženov inštitucijov narodnostnŷch menšŷn na Slovakiji. Zato tota inštitucija je z pohľadu pravnoho postavliňa narodnostnŷch menšŷn elementarno važnov, i jij zrušiňa, respektivno zlučiňa z inšov inštitucijov, bŷ značilo jednoznačnŷj krok nazad i z ľuďskopravnoho pohľadu,“ pyšuť organizatorŷ prypominkŷ.

V prypominci s’a pyše i to, že dvi oblasty, o kotrŷ s’a teper’ okremo starať Fond na pidporu umeňa i Fond na pidporu kulturŷ narodnostnŷch menšŷn, suť nezlučiteľnŷ.

„Novŷj fond bŷ ne dokazav povnyty svoju zadaču vŷchoďaču iz zakona any v oblasty pidporŷ kulturŷ narodnostnŷch menšŷn, any v oblasty pidporŷ slovac’koj kulturŷ – što malo bŷty pervistnŷm zamirom zakonodavc’u.“

Jak dalše pyše s’a v prypominci, zr’adžiňa narodnostnoho fondu v roci 2021 ocinyla i Zmišana maďar’sko-slovac’ka komisija pro spravŷ menšŷn, jak i Rada Evropŷ v poslidnij Spravi o implementaciji Ramkovoho dohovoru na ochranu narodnostnŷch menšŷn v SR.

Pokľa s’te hraždanom Slovac’koj republikŷ, i chočete pidpysaty prypominku, možete tak zrobyty tu.

Petro Medviď 

žridlo:
https://www.lem.fm/slovatska-vlada-vymenovala-upovnomochenoho-pro-menshyny-kabinet-maye-v-plani-rushyti-menshynovyj-fond/