Slovňik terminoch i po rusinski

Словнїк терминох и по русински
 
У Словацкей Републики тих дньох обявени перши Терминолоґийни словнїк за язики националних меншинох, медзи нїма и словацко-русински.

Терминолоґийни словнїк явносци представел ополномоценїк Влади Словацкей Републики за национални меншини Ласло Надь, а у нїм термини за урядово (службени) тексти и документи державних и других орґанох, за прекладанє зоз словацкого на язики меншинох.

Словацка Република вецейязична держава и тота стварносц ше одражує и на єй правни порядок, та пре запровадзованє правох меншинох на службене хаснованє язика и писма, потребни и урядово терминолоґийни словнїки - гварене на представяню Словнїка.

Словнїки виробели роботни ґрупи за кажду националну меншину, а у Роботней ґрупи за термини на русинским язику була фаховец за язик Алена Блихова, та фаховци за правни питаня и термини Мартин Дуфала, Богуслав Гарвиляк и Ярмила Микова.

Русински термини виробени на основи стандардизованей верзиї русинского язика, кодификованого 1995. року, та на основи приручнїкох за правопис русинского язика, хтори виробели русински язикознавци, на чолє з доц. др Васильом Ябуром, котри помагал и у вирябяню Терминолоґийного словнїку.

Словацко-русински словнїк обляпя найфрекветнєйши термини з вибраних сферох державней управи, локалней самоуправи, судства и других обласцох и за тераз ма 4 тисячи 996 административно-правни одреднїци, 443 скраценя и 142 назви правних предписаньох.

Словнїк будзе хасновити занятим у державней и явней управи, толмачом и прекладательом, а насампредз припаднїкох меншинох, пре витворйованє їх права на службене хаснованє мацеринского язика и писма.

(конєц) зам