Sovit kupuje ďilovni prostor u vidbudovi

Совит купує дїловни простор у вибудови
Национални совит (НС) Руснацох будзе участвовац у купованю дїловного простору у Новим Садзе, за потреби будуцого дому за школярох и студентох, а часц купеного простору будзе у власносци Националного совиту - єдногласно одлучене на Єденастей схадзки Совиту, всоботу, 30. юния, на хторей  присуствовали 18, а познєйше 17 з 19 членох Совиту.

Члени НС єдногласни у опредзелєню же би ше за потреби наших школярох и студентох вибудовало єден заєднїцки простор за їх змесценє у Новим Садзе, на  просторе дзе тераз Руски културни центер, цо врацене нашей церкви, а одкуп ше одноши на 33 квадратни метери квартелю у приватней власносци Милана Парошкия.

НС у одкупе того квартелю будзе участвовац зоз 30 тисячи еври - з половку питаней суми, а другу половку обезпечи Апостолски еґзархат за грекокатолїкох у Сербиї и Чарней Гори, гварел на соботовей схадзки предсидатель НС Славко Рац, толкуюци тото купованє, як и проєкт идейного ришеня будуцого дому.

У тим напряме, покля нє будзе наплацени висудзени пенєж од Еви Барановей, НС ше задлужи при Розвойней банки Войводини на суму од милион 200 тисячи динари, цо идуцого року будзе одплацоване квартално, по 300 тисячи динари, а одлука о задлужованю принєшена з єдним стриманим гласом.

У контракту з нашу церкву будзе наглашене хтора и яка поверхносц припаднє НС у будуцим будинку, а после купованя спомнутого квартелю, до єшенї би мала буц пририхтана и друга потребна документация, же би вибудов дому школярох вошла до плану Фонду за капитални укладаня Войводини у 2013. року.

Подобни дом за своїх школярох и студентох у Новим Садзе уж будую припаднїки мадярскей националней меншини у Сербиї.

(конєц) зам