Spivy moho rodu

POĎME SOBI ZASPIVATI NAŠY SPIVANOČKY
BO DAVNO JICH UŽ SPIVALI BABY I MAMOČKY
SPIVY MOHO RODU ZAVŠE PROZVUČAJTE
V NAŠYCH SERDCOCH TA I V DUŠI
NA VJIKY ZOSTAŇTE

Desiatky novych spivanok, množstvo radosti, spokyjny ďivaci, novy tvari, profesionalny koncerty, bezchybna organizácia i mnoho dalšych holovno pozitivnych privlastkyv možno priraditi centralnoj akciji Rusinskoj obrody na Slovensku „SPIVY MOHO RODU“, ktora sja odbyla v dňoch 24. – 28. septembra toho roku v mistach i selach okresiv Humenne, Snina i Medžilabirci.

Už po osmyj raz Rusinska obroda organizovala súťažnu prehliadku najľipšych rusinskych amatérskych spivakyv „SPIVY MOHO RODU“. Toto podujatie je jedinečne, bo vyhľadavat a podporuje molody talenty, zároveň i propaguje a predstavuje verejnosti už dovhoričnych a určite kvalitnych spivakyv z našoho regionu a v neposľidňim rjaďi propaguje i našu narodnostnu menšinu v každym smeri. Ani toho roku to nebylo inakše. Počas ciloho roku sja v okresoch na okresnych suťažnych prehliadkach, abo na vyberovych kolach vybirali toty najľipšy, ktory nasľidňi postupovali na centralnu akciju. Pripravovali sja notovy zápisy pro muzyku, ladili sja scenari i texty...

24. september odštartovav maraton koncerťiv, maraton spivanok, ktoryj sja začav detskyma koncertami v Uliči, Ubľi, Klenovoj i v Medžilabircjach. Molody spivaci i spivačky spivali za doprovodu ľudovoj huďby FS Chemlon z Humennoho a každyj choťiv podati što najľipšyj vykon.

ĎITI, ĎIŤAM. I tak možno charakterizovati toty ďetsky koncerty, ktory moderatorsky vela Lenka Magurová, bo molody spivaci vystupľali holovno ďetskomu publiku, ktore svojich rovesnikyv znalo patrični podporiti mohutnym aplauzom. Samozrejmi všytky byli vyborny, no najľipšyj može byti len jeden. Laureátom tohoričnoj ďetskoj časti festivalu sja stala Simona Fedorkova z Ubľi, ale možu Vam povisti, že všytkym ďiťam patrit obďiv a uznaňa, bo zvladli behom trjoch dniv náročny zhravky s orchestrom a iščy ku tomu i pjať naročnych koncerťiv s presunami autobusom. A toto všytko zvladli jak profesionali, bez tremy, bez strachu, vyrovnaňi. Prosto možu povisti, že rosnut nam veliky talenty našoj Rusinskoj ľudovoj spivanky.

Subota a neďiľa už patrila doroslym spivakom, ktory sja podobni jak ďetsky spivaci zyšli z okresiv Stara Ľubovňa, Sabinov, Prešov, Svidnik, Barďejov, Medzilaborci, Humenne, Snina i z inšych. V peršyj deň jich podobňi jak molodež čekala zhravka s orchestrom a popoludňu už i perše vystupiňa u Stakčiňi. Byv to nadhernyj koncert a účinkujúčym aplauzovala povna sala kulturnoho domu u Stakčiňi. Neďiľny dva koncerty v Medzilaborcach a v Humennym byli na vysokyj úrovňi a tot Humennskyj byv i vypredanyj a atmosfera v saľi Vihorlatskoho osvitovoho strediska gradovala. Moderatorsku taktovku si v ťim roci vzjali na pleča Ľudmila Kapráľová a Martin Karaš, ktory slovom doprovodili všytky tri dorosly koncerty. V záveri Humennskoho galakoncertu sja krestilo, bo laureati festivalu „SPIVY MOHO RODU“ Mária Čokynová, Marianna Železna, sestry Kačmarovy, Trio Makovica, Trio Magurovych, Ivana Sivuľkova a Martin Karaš a Lívia Husťáková vydali v spolupraci s Miroslavom Kerekaničom, otcom ciloj myšlienky festivalu „SPIVY MOHO RODU“ i joho dovhoričnym organizátorom CD RUTHENYKA, ktore pokrestili Mgr. Eva Arvayová, vedúca odboru kultury VÚC Prešov a PhDr. Pavol Mikula, direktor odboru menšinovych kultur z Ministerstva kultury SR.

V záveri už poťim ostali len ďvi mily povinosti. Vyholositi laureáta festivalu v doroslyj časti, ktorym sja stalo duo chlopiv z Makovici Pavol Fecenko a Jaroslav Čura iz Svidnika. A posľidňom milou povinnosťou, ktoru ja urobju za všytkych učinkujučich i ďivakyv je poďakovaňa pro Miroslava Kerekaniča, metodika Vihorlatskoho osvitovoho streďiska u Humennim a aktivnoho člena Rusinskoj obrody, ktoryj nelen že je dušou i serdcom tohto podujatia, ale riadiv, vjuv i usmerňovav joho priebeh nelem toho roku, ale už povnych osem rokyv existenciji tohto uspišnoho festivalu. ĎAKUJEME MIROSLAVE !

Martin Karaš